Семей теміржолшылары дін қызметкерлерімен кездесті
Абай облысы бойынша меншікті тілші
Жуырда Аягөз локомотив пайдалану депосында діни экстремизм мен терроризмнің алдын алу бойынша ақпараттық-насихаттық топ өкілдерінің теміржолшылармен кездесуі өтті, деп хабарлайды Rail-news.kz.
Жиынға депо қызметкерлері, машинистер қауымы мол жиналып, ақпараттық топ жетекшісі Ерлан Досымұлы мен Аягөз қалалық мешітінің наиб имамы Дәулет Қинаятұлының бабалардан жеткен дәстүрлі дініміздің асыл құндылықтары жайлы әңгімесін тыңдады. Олар жиналғандарды деструктивті топтардың жымысқы іс-әрекетінен хабардар етіп, арандатушы діни радикалды идеялар шырмауынан сақтануға шақырды.
Жалпы, бүгінгі күндері ел шығысы бойынша діни ахуал қалыпты болғанымен, Аягөз өңіріндегі жағдай ерекше назарда. Оған себеп те жоқ емес. Соңғы жылдары өңірде дін атын жамылып адасқан топ өкілдері құқық қорғаушылар құрығына жиі ілініп жүр. Астыртын түрде есірткі саудасымен айналысатын мұндай «діндарлардың» барлығы жастар екен. Сондықтан, діни сауаттылық қажет. Бір қуантарлығы, олардың арасында теміржолшылар жоқ. Әйтсе де, тез еліктегіш жас буынның шалыс басуына көпшілік болып жол бермей, оларды арандатудан сақтандыруды естен шығармаған жөн. Бұл орайда ақпараттық топ мүшелері зайырлы қоғам ұстанымдарына арқа сүйей отырып, дін мен дәстүрге тең мән беру керектігін, конфессияаралық келісім мәселелерінің ұдайы сақталуы қажеттігін де сөз етті.
Мазмұнды да тартымды өткен жиын локомотившілердің де көңілінен шыққаны анық, олар да кезегімен сөз алып, көкейде жүрген сауалдарын қойды. Тақырып аясында өзіндік ой-пікірлерін де білдірді. Осындай танымдық-тағылымдық мәні зор кездесулерді жиі өткізіп тұру керектігін де айтып өтіп, ақпараттық топ мүшелеріне алғыстарын білдірді.