Академик алғыс айтты
Елге келген Халықаралық басқару академиясының академигі, ғалым Есен Бидайбеков ағам телефон соқты. Сөйтсем Есен аға арғы күні №11 ХА Алматы-Шымкент бағытындағы Тальго пойызымен келген екен. Туыстары күтіп алып, үйге барғанда қол сағаты 14 вагонда жастықтың астында қалып кеткенін аңғарады.
- Балам, сенің теміржолға қатысың бар деп естуші едім. Қартайғанда әрбір сыйлықтың орнын білесің ғой. Ол қолсағатты жақын досым сыйлап еді. Оның үстіне қан қысымымды сол сағаттағы құрылғымен есептеп жүруші едім, - деді Есен аға.
Мен жедел «ҚТЖ» ҰК» АҚ-ы филиалы – Жамбыл магистальді желі бөлімшесі директорының вокзал шаруашылығы жөніндегі орынбасары Бейбіт Садықбековке телефон соғып, мән-жайды айтып бердім. Сөйтіп жамбылдық теміржолшылар араға бір күн салып, академик ағаның сағатын тауып берді. Бүгін Есен ағаға жоғалған затын қолына бердік. Әулиеаталық болат жолдың майталмандарының жеделдігіне риза болған ағамыз ақ батасын беріп, ризашылығын жеткізді.
