Маңғыстауда бір пойыздан екі ақау анықталды

Маңғыстау вагон пайдалану депосының қос бірдей вагон қараушысы бір уақытта бір құрамнан екі қауіпті ақауды анықтады. Ақтау порты станциясына келген жүк пойызына техникалық қызмет көрсету кезінде вагон қараушылардың назарына іліккен екі ақау да қауіпті деп танылды.

  Станцияға келіп тоқтаған №3601 жүк пойызын оң жақтан бастап тексеріп келе жатқан вагон қараушы Ерғали Башенбаев доңғалақ жұбы дискісінің жарығын бірден көреді. Ал дәл осы құрамды сол жағынан тексеріп келе жатқан Қонай Дайыров та дөңгелек жұбында букстың жылжып кеткенін анықтайды. Қос вагон қараушының да тапқан ақаулары мамандар тескеруінен соң дәлелденіп, қозғалыс қауіпсіздігіне қосқан үлестері үшін оларға алғыс жарияланды.  

– Пойыздың рельстен шығып кету жағдайының алдын алып, қозғалыс қауіпсіздігіне және өз міндетіне жауапкершілікпен қарағаны үшін вагон қараушыларымызға алғыс айтамыз. Олар ақауды дер кезінде тапты. Егер вагондар осындай кемшілігімен әрі қарай қозғалып кеткенде тағдыры не болары белгісіз еді. Бір жерде морт сынып, апатқа ұшырауы әбден мүмкін еді. Сондықтан мұндай мамандарымызды мақтан етеміз, – дейді Маңғыстау қосалқы бөлімі бастығының орынбасары Ерлан Бүркітов. 

Вагон қараушылардың екеуі де атамекенге оралған қандастар екен. 2006 жылы Маңғыстау ТҚКП мекемесіне вагон қараушы-жөндеуші болып жұмысқа орналасқан.