Түбек теміржолында өрт қауіпсіздігі тексерілді
Маңғыстау облысы бойынша меншікті тілші
Түбек теміржолында көктемгі өрт-техникалық тексеру жұмыстары аяқталды. Тілсіз жаудың алдын алу бағытындағы пысықтау шарасы 10 наурыз – 10 мамыр аралығында жүргізілді. Маңғыстау теміржолына қарасты нысандар мен жылжымалы құрамдар түгел өртке қарсы тексерістен өтті.
Өртке қарсы жасақ осы аталған уақыт ішінде жалпы саны 100 нысанды аралап, өрт қауіпсіздігі жағдайын егжей-тегжейлі тексеріп, 120 бұзушылықты тапты.
– Кемшіліктер әртүрлі, автоматты өрт дабылқаққыштың жарамсыздығы немесе жабдықталмауы, өрт сөндіргіштер ақауы, тоқ сымдарының ақауы, т.т. Оларға өрт қауіптілігі жайында ескерту парағы беріліп, кемшілікті түзетуге уақыт белгіленді. Сонымен қатар 10 901 жүк вагонына тексеріс жүргізілді. Олардың басым бөлігі – тез жанатын және қауіпті жүк тиелетін вагондар. Жолаушылар вагоны да назардан тыс қалмады. 72 жолаушылар вагонынан 13 бұзушылық табылып, 8-іне ескерту парағы берілді. Локомотивтер бойынша 224 локомотив бақылауға алынып, 99 бұзушылық тіркелген. Сондай-ақ, жазғы дала өрттері қауіп төндіретіндіктен жол жиектері тексеріліп, тиісті шаралар қабылданды, – деген Маңғыстау өртке қарсы қызмет жасағының бастығы Қайырхан Таласов ең бастысы – өткен төрт айда өрт оқиғасы тіркелмегенін айтады.
Дегенмен жаман айтпай, жақсы жоқ. Өрт бола қалған жағдайда сауатты әрекет ету үшін дайындықты пысықтау да маңызды. Осы мақсатта биыл мамырға дейін Бейнеу, Маңғыстау және Болашақ өрт сөндіру пойыздарының қатысуымен 5 оқу-жаттығу ұйымдастырылған.