Депутат маңғыстаулық теміржолшылармен кездесті
Маңғыстау облысы бойынша меншікті тілші
Парламент Мәжілісінің депутаты Еділ Жаңбыршин Мұнайлы ауданында Маңғыстау теміржолшыларымен кездесті.
Маңғыстау қосалқы бөлімшесінде өткен жиында Мәжіліс депутаты ҚР Конституциясына өзгерістер мен толықтырулар енгізуге қатысты әңгіме өрбітіп, өзгеріс енгізілетін бағыттар туралы баяндап берді. Елдің Ата Заңына әр азаматтың жауапкершілікпен қарап, алдағы референдумға белсенді қатысуға шақырды. Конституция белгілі бір топтың мүддесі үшін ғана қызмет ететін қағаз емес, мемлекеттік маңызы бар құнды құжат екенін айтып, оңтайлы өзгерістер Отанымыздың дамуына жол ашарына сенім білдірді.
«Референдум тәуелсіз Қазақстанның өсіп-өркендеуіне серпілістер мен сілкіністер әкелетін үлкен саяси реформа болғалы тұр. Мемлекет басшысының Конституцияға өзгерістер мен толықтырулар енгізуден бастауы – құптарлық іс. Енді осыған жүрегі елім, жерім, туған Отаным, халқым деп соғатын әрбір азамат белсенді түрде қатысып, өзінің ойын еркін білдіруі қажет», – деген Мәжіліс депутаты түбек теміржолшыларын толғандырған сұрақтарға да жауап берді.