Семей вркзалының қызметкерлері абаттандыру ісінде белсенді
Абай облысы бойынша меншікті тілші
Семей магистральдық желі бөлімшесінің теміржолшылары қоғамдық іс-шараларда мейлінше белсенді. Әсіресе, вокзал шаруашылығының қызметкерлері қаланың бас қақпасын көркейту, абаттандыру және түрлі экологиялық акциялар жүргізу бойынша әріптестерінен көш бойы озық келеді.
Биылғы көктемнен бастап вокзал шаруашылығы қызметкерлері аумақты көгалдандыру бойынша ауқымды жұмыс жүргізді. Вокзал маңына тал көшеттері отырғызылып, әр апта сайын сенбілік жұмыстары тұрақты түрде жүргізілді. Семей шаһарының қайтадан құрылатын Абай облысының орталығы болады деген жақсы жаңалық семейліктердің құлшынысын тіпті арттыра түскендей.
Кеше жергілікті атқарушы билік өкілдері тазалық және көріктендіру шараларын ұйымдастыруда белсенділік танытқан бірқатар қызметкерлер еңбегіне алғыс айтылып, қала әкімінің мақтау қағазы табыс етілді.
Аға буын өкілдері болса да, жастарға ісімен үлгі бола білген вокзал бастығының кезекші көмекшісі Диана Исалова, анықтама беру бойынша кезекші Майнұр Орымбаева мен оның әріптесі Тоғжан Жұмағалиева есімдері құрметпен аталып, еңбектері жастарға үлгі етілді.
– Шаһар қақпасы саналатын вокзалдың көрер көзге көрікті, тартымды әрі барлық талапқа сай болмағы бірінші кезекте оның қызметкерлеріне байланысты. Абай облысы орталығының бас теміржол қақпасы – вокзал бұл үдеден шығады деп сендіреміз, – дейді пікір білдірген НЖС-6 бастығының вокзал шаруашылығы бойынша орынбасары Ерлан Байтұрсынұлы.