Шұбарқұдық көркейе түсті
Ақтөбе облысы бойынша меншікті тілші
Шұбарқұдық электрмен жабдықтау ауданында электр бағаналары мен ғимарат аумағын әктеу, сырлау жұмыстары толығымен аяқталды.
Шұбарқұдық электрмен жабдықтау ауданы 6-разъезден бастап Сағыз станциясына дейінгі аумаққа қызмет көрсетеді. Учаскеде бір желілік аудан және үш монтерлік пункт бар. Онда 24 адам еңбек етеді. Оның 12-сі электр монтері. Көктем басталғаннан шаруаға кірісіп кеткен монтерлар аумақты тап-тұйнақтай етіп, тазартып қойған.
Шұбарқұдық электрмен жабдықтау ауданының басшысы Қайырбек Қамысбаевтың айтуынша, көктемгі комиссия- лық байқау кезінде учаскеде жасалған жұмыстарға жоғары баға беріліпті.
«Бағаналар нөмірмен белгіленіп, сырланды. Маусым айынан бастап жоспарлы жұмыстар жалғасады. Учаскеде 5 мыңның үстінде бағана бар. Күнделікті кесте бойынша тексеріледі. Қазіргі уақытта қысқа дайындық жұмыстары жүріп жатыр. Жаңбырлы, қатты жел, найзағайлы уақытта әуе желісі ағытылады. Бұл қолайсыз уақыт саналады. Жазда ақаулы жерді жөндеу жеңіл, ал қыста оқиға орнына жетудің өзі қиындық туғызады», – деген Қайырбек Қамысбаев, учаскедегі оқу-жаттығу алаңында тәжірибелік сабақтар ай сайын өтетінін атап өтті.
