Семей ЖТ бөлімшесі қозғалыс қауіпсіздігін күшейтті

Ел шығысындағы Семей ЖТ бөлімшесінің теміржолшылары қозғалыс қауіпсіздігі бойынша күшейтілген режимге көшті. Оған бірнеше факторлар себеп болуда. Аталмыш шаралар аясында бірқатар жоспарлы жұмыстар жүргізу де межеленіп отыр.

айдағы пойыздар қозғалысының қауіпсіздігі бойынша көрсеткіштер көңіл көншітпейді. Бірқатар ереже бұзу жағдайлары да орын алған. Сол себепті Семей жүк тасымалы бөлімшесінің бастығы Владимир Бабиченконың №673-ші бұйрығы бойынша ағымдағы жылдың маусым айының 15-ші жұлдызынан бастап, келер айдың 15-не дейінгі аралықта «Қозғалыс қауіпсіздігінің қатаңдатылған режимі» күшіне енгізілді. Мақсат – желі бойындағы және маневрлік жұмыстар кезіндегі жылжымалы құрамдардың қауіпсіздігін сақтау және бұл бағыттағы көрсеткіштерді жақсарту болып отыр. Бұл орайда «ҚТЖ-Жүк тасымалы» ЖШС басқарма төрағасының маусымның 14-і күнгі №86ЖТ бұйрығын орындау басшылыққа алынған.

Күшейтілген жұмыс режимі аясында жоспардан тыс тексерулер жүргізу, әсіресе қозғалыс саласы бойынша түнгі мезгілдегі бақылау шараларын күшейту, вагон қараушылар мен пойыз құрастырушыларға жүктелген міндеттемелердің орындалуын тексеру сынды жұмыстар орын алуда. Бұл реттегі шаралар осыған дейін де өткізілген болатын. Атап айтсақ, өткен аптада қозғалыс шаруашылығында күшейтілген жұмыс апталығы ұйымдастырылған. Оның барысында қозғалыс қауіпсіздігін үздіксіз сақтап қана қоймай, еңбекті қорғау және желі бойындағы өрт қауіпсіздігі де назарға алынды. Апталық аясында әсіресе станция қызметкерлеріне зор жауапкершілік жүктелді.

Ал, маусым айының 20-26 аралығында бөлімше көлемінде «Қазтеміртранс» АҚ шаруашылығы бойынша күшейтілген жұмыс апталығы енгізілген-ді. Вагонмен үзіліссіз қамтамасыз ете отырып, қауіпсіздікті сақтаудағы үдеріс барысы қатаң қадағалауға алынып, басты назарға қойылды.

Жалпы, шығыстағы теміржолшылар үшін қырағылық пен сергектікті арттыра түсу артықтық етпейді. Себебі, бөлімшенің Защита өңірінде қозғалысқа елеулі нұқсан келтіретін бірқатар жағдайлар орын алғаны белгілі. Атап айтсақ, өткен аптаның соңында «Көкжиек-Күмістау» теміржол учаскесінің 95-ші шақырымында жүк пойызының вагондары рельстен шығып кеткен болатын. Бұл өңірдегі соңғы үш айдың ішінде осымен үшінші оқиға саналады.

Қазіргі күні күшейтілген жұмыс режимі мен арнайы ұйымдастырылған апталықтар аясында шаруашылық ревизорлары, еңбекті қорғау инженерлері мен өндірістік-техникалық бөлім қызметкерлері де қауырт жұмысқа көшірілген.