Экшн-камералар ақтөбелік электршілердің жұмысын жеңілдетті
Ақтөбе облысы бойынша меншікті тілші
Ақтөбеде электрмен жабдықтау дистанциясы экшн-камералармен жұмысты жандандырды. Қауіпсіздікті бақылаудың цифры жүйесі қолдануға да жеңіл.
Бүгінде дистанцияда 14 экшн-камера бар. Олар дистанцияға қарайтын 7 электрмен жабдықтау аудандарына екі-екіден таратылған. Қалтаға, қорғаныш бас киіміне немесе қолға ұстап жүріп түсіруге ыңғайлы камераның сыйымдылығы да жоғары. Жұмыстың басталған сәтінен камера қосылып, барлық әрекет таспаға жазылады. Бейне-бақылаудағы жазба арқылы кейін жұмыс барысын қадағалап, жіберілген қателіктерге талдау жұмыстары жүргізіледі.
«Экшн-камералар 2021 жылдан бастап қолданыста. Барлық жұмысты бақылауға тиімді. Камераға сақталған жазбалар аудандардан айына бір рет дистанцияға әкелініп, онда түсірілген жазбаларға сараптама жасаймыз», – дейді Ақтөбе электрмен жабдықтау дистанциясының өндірістік оқыту шебері Қуанышбек Инжилисов.
Экшн-камераларға түскен жазбалар арқылы қауіпсіздіктің сақталу тәртібін бақылау жеңілдеген. Жұмыс кезіндегі адами факторлар, асығыс әрекетпен жол берілген қателіктер камерадан тайға таңба басқандай көрініп тұрады. Сараптама кезінде монтерлерге жазбадағы қателіктер көрсетіліп, оны қайталамау түсіндіріледі.
Экшн-камераның ерекшелігі мол. Шұғыл қозғалыс кезінде де анық түсіру мүмкіндігіне ие. Маңызды сәттерде кедергі жасамас үшін шағын өлшемді және салмағы да жеңіл етіп жасалған. Қарапайым бейнекамераға қарағанда әлдеқайда шағын және корпусы берік, соққыға және су мен ылғалға төзімділігі жоғары. Ақтөбе электрмен жабдықтау дистанциясының өндірістік оқыту шебері оқу-жаттығу кезінде де экшн-камераны қолданып жүргенін айтты.
«Оқу жаттығу алаңындағы жұмыстар да экшн-камераға түсіріледі. Мұны бәрі қауіпсіздіктің сақталуына, сақ болуға үйретеді. Жыл басынан бері Орал, Қазақстан, Ақтөбе аумағындағы барлық аудандарды аралап шықтым. Техникалық қауіпсіздікті қадағалаумен қатар жаңадан шыққан заңдар, бұйрықтар мен өзгерістер туралы ақпарат береміз. Қазақстан теміржолындағы тың жобаларды таныстырамыз», – дейді Қуанышбек Инжилисов.
Ақтөбе электрмен жабдықтау дистанциясының барлық аудандарын қосқанда штатта 225 қызметкер бар. Әр ауданда арнайы жоспар бойынша техникалық сабақтар тұрақты өтеді. Айына екі рет 80 минуттан барлық мекеме қызметкерлері техникалық қауіпсіздік дәрісіне қатысады.