Маңғыстаудағы ӘТЖК жыл басынан екі қылмысқа тосқауыл қойды

Маңғыстау станциясындағы әскерилендірілген теміржол күзетінің шұғыл әрекет ету тобы жыл басынан бері теміржолдағы екі қылмыстың ашылуына ықпал етті.

Қылмыстық фактілердің ізін суытпай анықтауда желілік полиция қызметкерлерінің жұмысын жеңілдеткен олар теміржол күзетінде аянбай еңбек етуде. Жоғарыда аталған екі оқиғаның біреуінде топ күзетшілері Маңғыстау станциясында теміржол торабының бөлшектерін ұрлаған тұрғынды ұстап, желілік полицияға тапсырған. Екінші жағдай Сай-Өтес станциясында орын алған. Жолаушылар пойызының терезесін қасақана шаққан адамды анықтап, оған да тиісті шара қолдану үшін тәртіп сақшыларына табыстаған. Одан бөлек топ күзетшілері полиция қызметкерлерімен бірлесе теміржолдың белгіленбеген жерінен өткен 44 адамды тоқтатып, оларға әкімшілік шара қолданылған. 

– Біз желілік полиция өкілдерімен тығыз байланыстамыз. Олармен бірлесе атқаратын өз жоспарларымыз бар. Жақында Маңғыстау станциясындағы желілік полицияның қылмыстық іздестіру тобы қызметкерлерімен тәжірибе алмасу ұйымдастырдық. Кездесу Маңғыстау станциясында паркте тұрған жүк вагондарының қасында өтті. Теміржолмен өтіп жатқан жүк вагондарының қауіпсіздігін қамтамасыз ету, оларды ашу, тонау сынды қылмыстық жағдайлардың жолын кесу, орын алған жағдайда қалай әрекет ету керек, бәрін кеңесіп, тәжірибе алмастық, – дейді бұл туралы ақпарат берген Маңғыстау станциясындағы шұғыл әрекет ететін оңтайлы топ бастығының орынбасары Мәди Үндемесов. 

Оның айтуынша, шұғыл әрекет ететін оңтайлы топ полиция өкілдерімен бірге өткен жылы да теміржолдағы үш қылмыстық істі әшкерелеген. Айталық, топ күзетшілері контейнердегі жүкті ұрлаған үш азаматты қылмыс үстінде ұстаған. Нәтижесінде оңай олжа таппақ болған пайдакүнемдер заң органдарына жеткізіліп, 3,5-4 жылға дейін бас бостандығынан айырылған.