Семейде вагон жөндеу депосы ашылды

Семей қаласында жаңадан вагон жөндеу депосының ашылу салтанатына Семей ЖТ бөлімшесінің директоры Владимир Бабиченко мен қала әкімі, теміржолшылар мен жергілікті атқарушы билік өкілдері қатысты.

Әзірге кәсіпорын алғашқы кезең бойынша жұмыс істейді. Яғни, бірінші кезекте дөңгелекті-роликті цех және вагондарды ағымдағы жөндеу жұмыстары орындалмақ. Ал, жоспар бойынша екінші кезеңде вагонның дөңгелек шеберханасын ашу көзделуде. Онда дөңгелек жұптарын құрастыру және оларды күрделі жөндеу жүргізілетін болады. Ең соңғы үшінші кезеңде депода ашық вагондарға күрделі жөндеу жүргізіліп, жылжымалы құрам үшін толық кешенді қызмет көрсетілетін болады. 

Айта кетерлігі, бұл жобаға салынған инвестиция шамамен 2,5 миллиард теңгені құрайды, оның ішінде 1 миллиард – жеке салымдар, 1,2 миллиард – екінші деңгейдегі банктер арқылы және тағы 300 миллион – «Даму» кәсіпкерлікті дамыту қоры арқылы алынып отыр. 

Қазіргі таңда жаңа депода әзірге 50 адам тұрақты жұмысқа тұрды. Болашақта тағы 110-130 жаңа жұмыс орнын ашу жоспарлануда. Олар жергілікті Семей теміржол колледжінің түлектері арасынан ғана қабылданатын болды. Ал, кейіннен жас мамандар Қарағандыдағы оқу орталығында білімін жетілдіріп, аттестациялаудан өтуге жіберіледі. 

Шара барысында қала әкімі айтып өткендей, аймақтағы жүк тасымалының артуы вагон жөндеу кәсіпорындарына түсетін жүктемені арттыруда. Яғни, вагон жөндеу деполарын жаңғырту немесе жылжыма- лы құрамның меншік иелерінің сұраныстарына орай заманауи деполар салу уақыт талабы болып отыр. 

Әзірше жаңа кәсіпорынның алдағы жұмыс көлемін есептеу біршама қиындық тудыруда. Бүгінгі таңда ірі компаниялармен – жылжымалы құрамдар иелерімен вагондарды жөндеу жұмыстары және қызмет көрсету бойынша арнайы келіссөздер жүргізілуде. Қазіргі күні Семей ЖТ бөлімшесі бойынша тәулік бойы тынымсыз ағылған вагондар санының өсу қарқынын және де Абай облысының экономикасы үшін теміржол саласының стратегиялық маңызы жоғары екендігін ескерсек, жаңа депо үшін жұмыс жеткілікті болары сөзсіз.