Маңғыстауда пойыздың мал басу оқиғасы азайды. Десек те...
Маңғыстау облысы бойынша меншікті тілші
Маңғыстауда пойыздың мал басу оқиғасы былтырғыға қарағанда әлдеқайда азайған. Десек те арқаны кеңге салуға әлі ерте. Жуырда Бейнеу станциясында бас қосып, кеңейтілген жиын өткізген аймақ ревизорлары осы мәселені талқылады.
Жол қозғалысына төрт түліктен келетін кері факторлардың алдын алу жұмыстарын жандандырып, күресу жайын жетілдіру қажеттігін алға тартқан ревизорлар келтірген фактілерге назар аударсақ, биыл алғашқы жартыжылдықта жиырмаға жуық мал жолға шығып кетіп, шығын болған. Оның 15-ін жолаушылар пойызы басқан. Жүк пойызына қарағанда жолаушылар пойызының анағұрлым жеңіл боларын ескерсек, бұл алаңдатарлық жағдай. Әсіресе Тальго жүрдек пойызының жолдан шығып кету қаупі жоғары дейді мамандар.
Сондықтан олар Бейнеу ауданына қарасты ауыл-аудандық округ әкімдерінің, теміржолға жақын орналасқан жеке шаруа қожалығы иелері мен құқық қорғау органдары қызметкерлерінің басын қосып, дөңгелек үстел ұйымдастырды.
– Өткен жылғы есеп бойынша өңір теміржолында 151 шұғыл тежеу беріліп, 100 мал басу жағдайы болды. Сондықтан, былтырдан биыл тәуір деуге болады. Оған өткен жылы Маңғыстау-Бейнеу станциялары аралығында өткізген осындай жиындардың әсері болмай қалған жоқ. Сол үшін бұл басқосудан да күтеріміз көп, – деген қозғалыс қауіпсіздігі департаментінің Маңғыстау аймақтық жол шаруашылығы ревизоры Б.Жалмұқановтың айтуынша, өткен жылы ел теміржолдарында жылжымалы құрамның адам басып кетуінің 26 жағдайы тіркелген.
Көп жағдайда ішімдік кесірі немесе адамдардың суицид жасауы себеп болғаны анықталған. Ал биылғы бес айда ҚТЖ-Жүк тасымалы бойынша адам басудың 4 жағдайы тіркелген. Соның ішінде балалардың пойыз астына түсіп қалуы ерекше алаңдатушылық туғызуда. Жасөспірімдердің жазғы демалысына орай балалар қауіпсіздігін сақтауда бірлескен іс шаралар ұйымдастыру керектігін ескерткен ревизор, осы тұрғыдан алдағы уақытта қолға алуға тиіс іс-шараларды да айтып өтті.
Айтуынша, бұған дейін де біраз шаралар ұйымдастырылған. 16 мамыр-16 маусым аралығында «Теміржол – қауіптілігі жоғары аймақ» айлығы жарияланған. Айлық кезінде 14 рет рейд өтіп, адамдар өтетін жерлердегі 13 ескерту аншлагтары мен қауіпсіздік белгілері жаңартылған. Теміржол арқылы жаяу жүргіншілер өткелдерінің бар болуы және жарамдылығы тексерілген.
Сонымен қатар, қараусыз жүрген төрт түлік үшін иесіне салынатын айыппұлды көбейту, малдарды сырғалау, мойнына шағылыстыру белгісін тағу, бақташы жалдау т.т. мәселелер қозғалды.
Жиын қортындысы бойынша тепловоздарға бейнекамера орнату және прожекторларына модернизация жасау туралы басшылыққа ұсыныс беру, мал көп жүретін жерлерге қоршау салу мен жөндеуді келесі жылдың бюджетіне енгізу, Қарақия ауданы әкімшілігі шаруа қожалықтарына жер бөлгенде теміржолдан қашықтан беруі, Бейнеу станциясында теміржолдан өту тәртібі туралы айлық рейд жүргізу, Бейнеу ауданы әкімшілігі темір жол бойында қараусыз жүрген малды уақытша қамайтын жай бөлуі туралы шешім шығарылды.