Маңғыстаулық вагон қараушысы Досжан Жұматов ақау тапты
Маңғыстау облысы бойынша меншікті тілші
Түбек темір жолы өзінің тәжірибелі мамандарымен мақтанады. Олардың өз міндетіне деген жауапкершілігі мен қырағылығы қозғалыс қауіпсіздігін қамтамасыз етуде.
Маңғыстау станциясындағы техникалық қызмет көрсету пунктінің вагон қараушысы Досжан Жұматов 8 шілде күні таңғы уақытта станцияға келіп тоқтаған №28005742 жүк пойызынан ақау тапты. №2824 вагонның доңғалақ дискісінен 280 мм жарықшақты анықтады. Ол Мақат бағытынан келе жатқан, ішінде жүгі бар вагон болатын. Мамандар тексере келе ақаулы вагонды құрамнан ағытып алуға шешім қабылдады. Тұйыққа жеткізілген вагонға қажетті қызмет көрсетілді.
– Теміржолшыларымыз өз жұмысында жақсы нәтиже көрсетіп, пойыздардағы апаттық жағдайлардың алдын алуда. Осы бірінші жартыжылдықта Маңғыстау бөлімшесі аумағында қозғалыс қауіпсіздігінің бұзылу дерегі, апаттық жағдай тіркелген жоқ. Оған үлес қосқан вагон қараушыларымыздың еңбегі ерен. Осы жартыжылдықта 19 вагон қараушының пойыздар қозғалысына қауіп төндіретін 22 вагоннан түрлі ақау тапты. Олардың бәрі дер кезінде ағытылып, пайдаланудан алынды, – дейді Маңғыстау қосалқы бөлімі бастығының бірінші орынбасары Ерлан Бүркітов.
Ал вагон қараушы Досжан Жұматов еңбек жолын 2006 жылы слесарь болып бастаған екен. Аға буыннан үйрене жүріп бүгінде өзі де тәжірибелі маманға айналды. Осы жылдың өзінде бірнеше ақау тауып көзге түскен.