Отын ресурсы үнемделген
Ақтөбе облысы бойынша меншікті тілші
«ҚТЖ-Жүк тасымалы» ЖШС «Батыс» филиалының Ақтөбе, Орал бөлімшелері биылғы жылдың алғашқы жартыжылдығын жоғары көрсеткіштермен қорытындылады.
Өткен алты айда 8 млн 873 мың 302 тонна жүк тиелді. Оның ішінде «Нұрлы жол» мемлекеттік бағдарламасы бойынша 694 мың 355 тонна жүк жөнелтілген. Әсіресе, Ақтөбе-Қандыағаш, Қандыағаш-Сағыз учаскелеріндегі құрылыс жүктерін тиеу-түсіру көлемі 30 пайызға артып отыр. Жүк айналымының жоспары 103,5%-ға орындалып, жалпы, жүк айналымы алты айлық қорытынды бойынша 5,9%-ға өскен. Батыс аймақ бойынша тасымалдау про- цесіне байланысты қызметкерлердің еңбек өнімділігі 122,6 пайызға орындалды.
«Өткен жылмен салыстырғанда пойыздарда отын- энергетикалық ресурстарды тұтыну бойынша үнем бар. Дизель отыны осы алты ай ішінде 3,13% үнемделген», – деді техникалық бөлімнің жетекші инженері Әлия Абдуллина.
Тоғыз жолдың торабында, қолайлы географиялық аймақта жатқан Батыс темір жолы өтетін көлік дәліздерінің транзиттік әлеуетін дамыту жұмыстары жалғасуда.