Маңғыстауда қозғалыс қауіпсіздігінің бұзылу жағдайына жол берілген жоқ
Маңғыстау облысы бойынша меншікті тілші
«ҚТЖ-Жүк тасымалы» ЖШС Маңғыстау қосалқы бөлімі бойынша өткен алты айда қозғалыс қауіпсіздігінің бұзылу жағдайына жол берілген жоқ.
15 маусымнан 15 шілдеге дейін жарияланған қауіпсіздік айлығы аясында бірқатар іс-шараның өтуі жоспарланған. Аймақтық және желілік мекеме басшылары станция, локомотив және вагон деполарында кезектен тыс тексерістер жүргізіп жатыр. Мекеме басшылары Бейнеу, Маңғыстау, Шетпе, Өзен, Болашақ станцияларында, Маңғыстау депосында және Бейнеу айналым депосында, техникалық қызмет көрсету пункттерінде тексерістер мен техникалық сабақтар өткізуде.
– Қауіпсіздікті сақтау – бәрімізге ортақ міндет. «Темір жол – қауіптілігі жоғары аймақ» айлығы аясында көліктік бақылау комитеті, желілік полиция өкілдерімен бірлесіп 13 станцияда темір жол маңындағы жергілікті халыққа, мектептерде, колледждерде адамдарды басып кету, жарақаттау және сол сияқты жағдайлардың алдын алуға бағытталған түсіндіру жұмыстарын өткіздік, – дейді Маңғыстау қосалқы бөлімінің қозғалыс қауіпсіздігі қызметінің бас маманы Асхат Шарапатдинов.
Сонымен қатар, қозғалыс қауіпсіздігінің сақталуына үлес қосып, жылжымалы құрамнан түрлі ақаулықтарды анықтап жүргендердің еңбегін әділ бағалау да естен шығарылмайды. Осы жарты жыл ішінде 8 вагон қараушы мен 1 локомотив бригадасының еңбегі ескеріліп, марапатқа ұсынылған.