Аймақ ревизорлары жыл басынан бері қалай жұмыс істеуде?
Абай облысы бойынша меншікті тілші
Семей ЖТ бөлімшесі бойынша ревизорлық тексеру, қадағалау жұмыстары қатаңдатылған түрде жүрізілуде. Басты мақсат – теміржолдағы қозғалыс қауіпсіздігін сақтау бойынша талаптардың орындалуын қадағалау, ақаулықтарға жол бермеу, жүк және жолаушы тасымалын кідіріссіз жүргізу. Осы ретте аймақ ревизорлары жыл басынан бері қалай жұмыс істеуде?
Бұл жайында жуырда бөлімшеде өткен ревизорлардың 6 айлық есептік жиынында «ҚТЖ» ҰК» АҚ Қозғалыс қауіпсіздігі департаменті Семей телімінің аймақтық бас ревизоры Темірбек Ақчалов айтып өтті. Басқосуға бөлімше басшысы Владимир Бабиченко, Семей магистральдық желі бастығы Айдын Шәукежанов және шаруашылықтар ревизорлары қатысты.
Бас ревизор тоқталып өткендей, ағымдағы жылдың өткен жарты жылында 341 тексеру жүргізіліп, анықталған кінәраттар негізінде 522 тыйым салу шарасы қабылданыпты. Кемшілік жіберген бірқатар жұмысшылардың кәсіби деңгейі, білімдері тексерілген.
Мұнымен қоса, жылжымалы құрамның жылдамдығын шектеу, жолдар мен бағыттамаларды уақытша жабу, т.б. шаралар арқылы тікелей қозғалыс қауіпсіздігін бұзуға алып баратын өрескел ақаулықтарға тосқауыл қойылған. Осының нәтижесінде Семей өңірінде оқыс оқиғаларға жол берілмеген.
Сол тәрізді биылғы еңбек қауіпсіздігін қорғау жылы аясында шаруашылық ревизорлары тарапынан өндірістегі жазатайым оқиғалардың алдын алуға да елеулі түрде күш салынуда.
Бас ревизор, сонымен қатар, ай сайын теміржол шаруашылықтарының жай-күйіне, атқарылып жатқан жұмыстарға талдау жасалып, анықталған кемшіліктер сарапталып отыратынын жеткізді. Оның нәтижелері қозғалыс қауіпсіздігін қамтамасыз ету деңгейін арттыру мақсатында желі бойындағы мекемелерге жіберіледі. Соңғы алты айдың көлемінде 84 ұсыныс пен 142 нұсқама жолданыпты. Сондай-ақ, бас ревизордың төрағалық етуімен жол қозғалысы қауіпсіздігін қамтамасыз ету мәселелері бойынша ай сайын селекторлық кеңес өткізіліп, анықталған кемшіліктер желілік және аймақтық деңгейдегі басшылар назарына ұсынылады екен. Биылғы алты ай қорытындысы бойынша қызметіне салғырт қараған түрлі деңгейдегі бірқатар басшылар тәртіптік жауапкершілікке тартылған. Десек те, аймақтық ревизорлар аппараты (РБ-6) алдында ағымдағы жылдың екінші жартыжылдығы бойынша бірқатар міндеттемелер бар екен. Атап айтсақ, қозғалыс қауіпсіздігін сақтау деңгейін арттырып, оған нұқсан келтіретін олқылықтарға жол бермеу мәселесі күн тақырыбынан түспей тұр.
– Жоспарлы шаралардан бөлек, биылғы жылы сұрыптау дөңестеріндегі жұмыстарға, шалғай станциялардағы маневрлік локомотив бригадаларының қызметіне, нақтырақ айтсақ, олардың еңбек және демалыс режимінің белгіленген тәртібін сақтауына ерекше назар аударылуда. Ол үшін қосымша тексеру шаралары қарастырылған. Сол тәрізді желі бойындағы барлық мекемелердегі өндірістік процесс те қатаң қадағаланатын болады, – дейді бұл орайда аймақтық бас ревизор Темірбек Иманғабасұлы.
Жиын соңында қызметінде олқылықтар орын алған бірқатар мекемелер жұмысы сөз болып, олардың басшыларына кемшіліктерді жою жөнінде арнайы нұсқау берілетін болды. Ревизорлар анықтаған кінәраттар белгіленген мерзім ішінде түзетілуі тиіс. Келесі тексерулер кезінде қайталанатын болса, қатаң шаралар қабылданбақ. Ал, бұл орайда бүкіл желі бойын уақытпен санаспай сүзіп шығатын семейлік ревизорлар назарынан ешбір ақау тыс қалмайтынына сенім мол.