Шалқар станциясында қатты жел ғимараттардың шатырын жұлып әкетті
Ақтөбе облысы бойынша меншікті тілші
Шалқар станциясында қатты жел тұрып, теміржол бойын біраз әбігерге салды.
Оқиға 19 шілде күні сағат 21:50-де тіркелді. Облыстық ТЖД кезекші-диспетчерлік пультіне Шалқар станциясында болған дауыл туралы ақпарат түсті.
– Қатты желден теміржол ғимараттарына зақым келген жоқ. Тек жақын маңдағы ғимараттардың шатыры ұшып, қираған қалдықтары теміржол бойына үйіліп қалды. Вокзал маңындағы №2 мектеп шатырының бір бөлігі ұшып кетті. Жел кезінде вокзалдағы жолаушылар қауіпсіздігіне көңіл бөлінді. Абырой болғанда жолаушылар пойызы келген уақыт емес еді. Зардап шеккендер болған жоқ. Ал жол бойына ұшқан жабындылар 30 минут ішінде жиналып, перрон да тазартылып, жолаушы пойызы келгенше дайын болды, – дейді Шалқар станциясының басшысы Жолдыбай Ізтілеуов.
Табиғи құбылыс тәулігіне 25-30 пойызға дейін өтетін станцияда қозғалысқа кедергі келтірген жоқ. Жолаушы пойыздарын қабылдау-жөнелту, жүк түсіру-тиеу жұмыстары кестеге сай ұйымдастырылды.