Өрт кауіпсіздігіне орай кезекшілік ұйымдастырылған
Оңтүстікте, соның ішінде Жамбыл өңірінде де күн ысып кетті. Алдын ала болжамдар бойынша алдағы күндері ыстықтың беті қайтпайтын сыңайлы. Кейбір жерлерде сынап бағанасы 50 градусқа жеткен көрінеді.
Бұған алаңдаған жұртшылықтың қаупі жоғары. Әсіресе, аптап ыстықта оп-оңай тұтана салатын өрт қаупі қашан да бар. Біз де осы мәселеге алаңдап, Жамбыл магистральдық желі бөлімшесіне қарасты Жамбыл мемлекеттік емес өртке қарсы қызметі басшысының орынбасары Мұрат Дүйсембиевке қоңырау шалып, болат жолдың бойындағы ахуалды сұраған едік. Мұрат Әубәкірұлының айтуынша, жамбылдық өртке қарсы қызмет жасағы 1206 шықырымда өрт қаупін қадағалап отыр. Ағымдағы жылдың алты айында жүк тасымалы пойызында бір өрт оқиғасы орын алған. Ал, қозғалыс құрамында үш рет түтіндеу оқиғасы болыпты. Абырой болғанда өрттің алдын алған.
– Негізі, магистральдық желі бөлімшесіне қарасты өртке қауіпті аймақ – халық тығыз орналасқан Түрксіб-Тараз-Түлкібас аймағы. Мамыр айында Шешенқара станциясында техника тасымалдап бара жақан жүк пойызында өрт шықты. Сарышаған станциясындағы өрт сөндіру пойызы көмекке келіп, тілсіз жау ауыздықталды. Бүгінгі күні осы оқиғаға қатысты Шу станциясындағы желілік ішкі істер бөлімінің мамандары тергеу амалдарын жүргізуде, – дейді Мұрат Әубәкірұлы. Қазіргі күні Тараз, Шу, Сарышаған станцияларындағы өрт өндіру пойыздарының жасақтары жергілікті Төтенше жағдайлар департаментінің мамандарымен бірге өрттің алдын алу шараларын жүргізуде. Тіпті, ерікті жасақ та құрылған. Темір жол бойындағы станция тұрғындарымен өрт қауіпсіздігі жайлы түсінік жұмыстары жүргізілуде екен. «Ең бастысы, соңғы күндері күннің күрт ысып кетуіне байланысты тәулік бойы кезекшілік ұйымдастырылып отыр» дейді Мұрат Дүйсенбеков.