Жармыш ауылында полиция өкілдері мен теміржолшылар тұрғындармен кездесті
Маңғыстау облысы бойынша меншікті тілші
Маңғыстаудың шет жақтағы, халқының басым бөлігі мал ұстайтын Жармыш ауылында желілік полиция өкілдері мен теміржолшылар тұрғындармен кездесу өткізді.
Жергілікті әкімдік қызметкерлерімен бірге ауылдағы үйлерді аралаған олар тұрғындарды теміржолдағы қа- уіпсіздік ережесімен таныстырып, мал бағуда ескеретін жайттарды түсіндірді. Теміржолға жақын жайылған төрт түлікке төнетін қауіп-қатер, қарапайым шарттарды елемей, малды қараусыз қалдырудың салдарынан мысалдар келтірілді. Биыл, мысалы, Сай-Өтес желілік полиция бөлімшесінің қызмет көрсету аумағында пойыздар 16 шұғыл тежеу беруге мәжбүр болған. 12 жағдайда қауіпсіздікке қатер төндірген мал иесі анықталып, әкімшілік жазаға тартылған.
– Өткен жылдың сәйкес мерзімінде 24 рет шұғыл тежеу беріліп, 19 мал пойызға басылған еді. Биыл тежеулер саны 8 дерекке азайды. Демек, «Теміржол көлігі туралы» және басқа да нормативтік-құқықтық актілерге сәйкес нұсқаулықтар бойынша мал жаю- дың ережелерін үздіксіз түсіндіріп, әкімшілік шара, айыппұл туралы ескертулер халыққа аз да болса әсер еткен шығар деп ойлаймыз, – дейді Сай-Өтес станциясындағы желілік полиция бөлімшесінің бастығы Нұрлыбек Рахметов.