Семейде майталман теміржолшылар марапатқа кенелді

Семейлік теміржолшылар үшін биылғы кәсіби мереке ерекше есте қалары анық. Ұлттық компанияның 25 жылдық мерейтойы ел шығысында да кең көлемде аталып өтіп, майталман теміржолшылар марапатқа кенелді.

Қалалық Мәдениет сарайында өткен мерекелік салтанатты шарада сөз алған бөлімше басшысы Владимир Бабиченко отандық теміржол саласының бүгінгі таңда қол жеткізген биігі мен жалпы ширек ғасырлық тарихына тоқталды. Сонымен қатар, алдағы мақсат-міндеттер де сөз болды. Бұл ретте Мемлекет басшысы жүктеген айрықша маңызды міндет – Аягөз-Бақты теміржол телімін салуға қатысты жүргізілетін жұмыс алдымен назарға алынды.

Сондай-ақ, салтанатты шара барысында теміржолшыларды Семей магистральдық желі бөлімшесінің басшысы Айдын Шәукежанов пен салалық кәсіподақ ұйымының бөлімше бойынша төрағасы Алик Досанов құттықтап, ізгі лебіздерін білдірді.

Келесі кезекте кәсіби қызметте еселі еңбектерімен танылып жүрген теміржолшыларды марапаттау рәсіміне кезек берілді. Биылғы басты ерекшелік сол, Семей ЖТ бөлімшесінің төрт бірдей қызметкері «Құрметті теміржолшы» атанды. Олардың қай-қайсысы болмасын құрметке лайық. Мәселен, елорда төрінде өткен салтанатты жиында ұзақ жыл белгі беру және байланыс саласында қажырлы еңбек еткен, «Түрксіб» мұражайының негізін қалаған ардагер Мақсұт Көшжанов, еңбек жолын қатардағы жол жөндеушіден бастап Семей жол дистанциясының басшысы деңгейіне көтерілген Рахат Ботаспаев сынды теміржолшылар құрметті атаққа әбден лайық екені талас тудырмайды.

Сонымен қатар, Нұрлан Жақсылықұлы, Мырзабек Керейбаев, Мұрат Мұқажанов, Зульфия Еникеева, Наталья Мешкова, Дайырбек Досанов, Бекзат Кәрімханов, ұзақ жылдар Семей вокзалын басқарған ардагер теміржолшы Нағима Мойынбаева сынды теміржолшылар түрлі деңгейдегі марапатқа ие болды. Сала кәсіподағының 30 жылдық мерейтойына орай арнайы шығарылған төсбелгімен марапатталғандар қатары да аз болмады.