Маңғыстауда екі күндік профилактикалық іс-шара өтті
Маңғыстау облысы бойынша меншікті тілші
Маңғыстауда желілік полиция мен теміржолшылардың қатысуымен екі күндік профилактикалық іс-шара өтті. Вокзал аумағында және пойыздарда халыққа теміржол көлігінің қауіп-қатерін түсіндірген топ тыйым салу белгілері бар үнпарақтар таратты.
Темір жолда қарапайым жүріс-тұрыс ережелерін сақтамаудың салдары ауыр болатынын күнделікті өмірде көріп-біліп жүрміз. Пойыз астына түсіп, абайсызда ажал құшқандардан бөлек өмір бойы мүгедек болып қалғандар қаншама...
Сондықтан осындай келеңсіздіктер санын сәл де болса азайтуға мүмкіндік беретін шаралар теміржол бойында жыл он екі ай тоқтаусыз жүргізіледі. Маңғыстау станциясындағы желілік полиция өкілдері ерікті жастармен бірлесе 8-9 тамыз күндері теміржол вокзалында және перронда жолға шыққалы тұрған жолаушыларды аралап, темір жолдағы қауіпсіздік туралы түсінік беріп, брошюра таратты.
Сонымен қатар теміржол бойындағы болатын түрлі құқықбұзушылықтардың жолын кесу мақсатында әскерилендірілген теміржол күзетінің мамандары жол дистанциясының өкілдерімен бірге рейдке шықты. Олар темір жолдың белгіленбеген жерінен өтіп, қозғалысқа және өз өміріне қауіп төндірген 5 адамға қатысты ҚР ӘҚБтК-нің 559-бабы 5-бөлігіне сай хаттама толтырды.
– Тұрғындарға темір жолдың тек белгіленген жерінен ғана жүруді және жолға жақындаған кезде құлақтағы наушникті алып тастауын ескертеміз. Көбі жолдан өткенде телефонмен сөйлесіп бара жатады немесе жастар жағы құлағын тарс бекітіп әуен тыңдап жүреді. Бұл қаншалықты қауіпті екенін жастардың санасына жеткізуге тырысамыз. Сонымен қатар асығып, айналып өтуге ерініп, тоқтап тұрған вагондардың астынан өтуге, үстіне шығуға, жүріп бара жатқан пойыз құрамынан жерге секіруге немесе жабысуға болмайтынын түрлі мысалдармен түсіндірдік, – дейді Маңғыстау станциясындағы желілік полиция бөлімшесінің Әкімшілік полиция бөлімінің бастығы Нұр Қуанов.