Карантин талаптары қайта күшейді

Ақтөбе теміржол вокзалы еліміздегі соңғы эпидемиологиялық жағдайға байланысты сақтық жұмыстарын күшейтті. Жолаушылар арасында арақашықтықты сақтау, антисептик пайдалану тәртібі қадағаланып жатыр.

Шілде айының соңынан бастап елімізде коронавирус жұқтырғандар саны күрт көбейгені мәлім болып отыр. Қоғамдық орындарда карантиндік шаралар мен сақтық жұмыстары күшейтілуде. Тек өткен тәулікте елімізде 1651 адамның коронавирус жұқтырғаны тіркелді. Індет жұқтырғандардың дені Нұр-Сұлтан және Алматы қалаларында, Ақтөбеде де 100-ге жуық адамның қауіпті індетті жұқтырғаны анықталды. 

– Вокзал – стратегиялық аймақ. Жолаушылардың қауіпсіздігі ең алдымен қамтамасыз етілуі тиіс. Сондықтан қалыптасып отырған эпидахуалға байланысты халық көп жүретін вокзалдарда сақтық шараларын қайта қолға алдық. Билет кассаларының алдында қашықтықты сақтау тәртібі қадағаланып тұр. Антисептиктер қайта толтырылып, тазалыққа қатты көңіл бөліп жатырмыз. Күніне төрт рет ылғалды тазалау жүреді. Ғимараттың кіреберісіне қойылған компьютерлік бағдарлама бір мезетте 30 адамның дене қызуын өлшей алады және ол адамдардың қасына жақындамай-ақ, алыстан дене қызуын тексереді, – дейді Ақтөбе теміржол вокзалының басшысы Тойбазар Қуанышев. 

Сонымен қатар, вокзалда қала тұрғындары мен қонақтарын ақпараттандыру мақсатында роликтер көрсетіліп, індеттен сақтануға қатысты радио хабарландырулар сағат сайын өтіп жатыр. Жолаушылардың арасында індет жұқтырған адам анықталса, изоляция бөлмесі де дайын. Ауру анықталған жағдайда жолаушылармен байланысқа түспейтін бөлек есігі бар оқшаулау бөлмесі жабдықталған.