Маңғыстау теміржолында күзгі тексеріс жүріп жатыр

Маңғыстау теміржолында күзгі комиссиялық байқау қыркүйектің басынан басталды. Қазанның жетісінде қорытындыланып, кем-кетік сарапқа салынатын болады, деп хабарлайды Rail-news.kz.

Биыл да Болашақтан басталған байқау 5-9 қыркүйек аралығында Болашақ-Маңғыстау теліміндегі барлық станциялар мен жолайрықтардың жұмысы жіті тексеріліп, мекемелердің қысқа дайындығы пысықталды.  

– Комиссияға Маңғыстау қосалқы бөлімінің басшысы Нәжімеден Ғұбашов төрағалық етуде. Бұл топтың құрамында барлық құрылымдық сала басшылары мен қызметкерлері және ревизорлық аппараты жұмылдырылған. Алдымен шалғай станция бекеттерін сүзіп шығамыз, ал Маңғыстау станциясын ең соңына қалдырып отырмыз. Жалпы, түбек теміржолындағы күзгі тексеріс 23 қыркүйекте аяқталады деп жоспарлануда. Ал 7 қазанға дейін талдау жұмыстары жалғаспақ. Тексеру нәтижелеріне сәйкес талдау жұмыстары жүргізіліп, анықталған кемшіліктерге байланысты іс-шаралар жоспары жасақталады. Кемшіліктерді жою жұмыстары қолға алынады, – дейді Маңғыстау қосалқы бөлімінің өндірістік-техникалық бөлімі инженері Асхат Шарапатдинов.  

Болашақ-Маңғыстау аралығынан кейін комиссия мүшелері аттың басын Құлсары–Бейнеу, Тассай–Бейнеу, Оазис–Бейнеу, Бейнеу–Сай-Өтес, Сай-Өтес–Маңғыстау телімдеріне және Құрық порты станциясы бағытына қарай бұрмақ. Аталған нысандарда инфрақұрылымның, жылжымалы құрамның, өндірістік-техникалық объектілердің, техникалық құралдардың жағдайы сын көзден өтеді.