Теміржолда шыңдалған азамат бүгінде ел басқарып отыр
Кеше ғана Маңғыстау облысы әкімінің орынбасары болып тағайындалған Нұрдәулет Қилыбайдың алғашқы мамандығы теміржолшы екенін біреу білсе, бәлкім біреу біле бермес. Ол да теміржолдағы қарапайым мамандықтың бірінен бастап, талай жыл осы саланың домнасында шыңдалған теміржолшы.
Еңбек жолын теміржолда станция кезекшісі болып бастаған. Бүгінде биліктегі белді шенеуніктердің біріне айналған ол осыған дейін Ақтау қаласын екі жыл бойына басқарған еді. Жергілікті атқару саласына 2018 жылы, өзі туған өңір - Маңғыстауға облыс әкімінің орынбасары болып келген болатын. Оның алдында көлік саласындағы бірқатар мамандықтан, жоғарғы лауазымдардан өткен. Алматы теміржол көлігінің инженерлері институтын «Теміржол көлігі бойынша тасымалды үйымдастыру инженері» мамандығы бойынша бітіріп, алғашқы дипломын алған.
Сонымен 1999 жылы Маңғыстау тасымалдау бөлімшесі станциясының кезекшісі болып еңбекке араласқан. Астана станциясында кірме жолдар бойынша жүктерді қабылдап-тапсырушы, «ҚТЖ» ҰК» АҚ бас маманы, бөлім бастығы, магистральды желілер дирекциясы басқарушысының көмекшісі, Көлік және қатынас жолдары комитетінің бөлім бастығы, басқарма бастығы, төрағаның орынбасары қызметінде болған.
2009 жылдан кейін «Вокзал-сервис» АҚ президенті, «ҚТЖ» ҰК» АҚ Жолаушыларды тасымалдау жөніндегі басқарушы директоры, Көлік және қатынас жолдары комитетінің төрағасы, «ҚТЖ» ҰК» АҚ президентінің кеңесшісі, Маңғыстау жол бөлімшесі филиалының директоры, «ҚТЖ» ҰК» АҚ аппарат басшысы - атқарушы директоры, «ҚТЖ» ҰК» АҚ атқарушы директоры - «Жолаушылар тасымалдау» АҚ президенті, «Теміржолсу» АҚ Бас директоры – Басқарма төрағасы қызметтерін атқарған. Осылай, ең төменгі деңгейден бастаған ол, 2008 жылы «Құрметті теміржолшы» атағына ие болды.
Нұршаһ Алымқызы, Маңғыстау