Семейде күзгі бақылау жұмыстары аяқталды

Семей ЖТ бөлімшесі бойынша күзгі комиссиялық байқау жұмыстары аяқталды. Қыркүйектің 12-ші жұлдызында басталған тексеру шаралары 30 қыркүйекте қорытындыланды.

Биылғы бақылау жұмыстары біршама ұзаққа созылды. Оған себеп көп, бірқатар телім мұқият сүзгіден өткізіліп, жіті тексерілді. Қысқы мезгілде сыр беруі мүмкін участоктарда шаруашылық ревизорлары ұзағырақ аялдап, жанжақты жұмыс жүргізді. Мәселен, биылғы жазда бірнеше мәрте ақаулық орын алған Защита – Күмістау телімдері мен жыл басынан бері транзиттік пойыз ағыны күрт артқан Семей-Локоть бағытындағы «солтүстік тармақта» бақылаушылар «май шаммен» қараған мәселелер қатары өте көп болды.  

Ең алдымен қызметтік вагонмен Ақтоғай–Аягөз бағытын сүзіп шыққан ревизорлар, өндірістік-техникалық бөлім қызметкерлері, бөлімдер басшылары аймақтағы жазғы жұмыстарды қорытындылап, қысқа даярлық барысын таразылады. Содан кейінгі кезекте Жарма–Шар, Шар–Жаңа-Семей телімдерінде де айрықша назар аударуды қажет ететін бірнеше мәселе болды. Бұл аймақтарда жазғы мезгілде бірқатар толаскездер өткізіліп, жол табаны жаңарған болатын. Ал, елдің қиыр шығысындағы Алтай учаскесі мен Локоть-Шемонайха, Өскемен-1–Риддер телімдері ең соңғы кезекте мұқият тексерілді.  

Байқау барысын талқылаған тораптық жиындар Аягөз, Шар, Шемонайха станцияларында өтіп, атқарылған жұмыс жан-жақты сараланды.  

– Негізінен шағын станциялар мен жол айрықтарына баса мән берілді. ЦЗ-1 Қанат Әлмағамбетовтің №00029 А телеграфтық нұсқауын басшылыққа ала отырып теміржол саласына қатысты барлық мәселе назардан тыс қалмады, – дейді бөлімшенің өндірістік-техникалық бөлімінің мамандары.  

Күзгі тексеру анықтағандай, қазіргі күндері барлық станциялар мен теміржол мекемелері қысқа даярлық жасаудың соңғы сатысына көшуде. Ғимараттар, желі бойындағы жекелеген нысандар, модульдер мен байланыс құрылғыларының қатал маусымға әзірлігі аяқталуға жақын. Барлық мекемелер дерлік көмірмен қамтылған, өрт қаупі тексерілді. Енді бөлімшеде 7 қазанда өтетін күзгі комиссиялық бақылаудың қорытынды жиынында жалпы ахуал кең көлемде сарапталып, талқыланады. Онда бөлімше ревизорлары мен өндірістік-техникалық бөлімнің мамандары арнайы баяндама жасап, нақты шешім қабылданатын болады.