Теміржолшылар тазалық акциясына қатысып жатыр
Ақтөбе облысы бойынша меншікті тілші
Ақтөбелік теміржолшылар екі айға созылатын «Жаңа Қазақстан – таза Қазақстан» тазалық акциясына қатысуда.
«ҚТЖ-ЖТ» ЖШС «Батыс» филиалының ғимаратында отырған Ақтөбе жүк тасымалы және магистральдық желі бөлімшелерінің ұжымы өткен сенбіде жаппай сенбілікке шықты. Олар теміржол ғимаратының ауласын, сол маңдағы көшелерді тазалап, жапырақтар жиналып, өңі кеткен бағаналар сырланды.
«Ақтөбе – батыс өңіріндегі ірі қала. Қаламыздың тазалығына әр тұрғын жауапты. Соның ішінде теміржолшылар мұндай шарадан қашанда қалыс қалған емес. Аумақты тазалау жұмыстары тұрақты жүргізіледі», – дейді Ақтөбе магистральдық желі бөлімі директорының орынбасары Темірғали Көштаев.
Республика көлемінде жарияланған екі айлық санитарлық-тазалық жұмыстары теміржол мекелерінде осыған дейін де өткен. Бұл жолы ауқымды түрде, екі бөлімшеден 50 адам қатысқан сенбілік болды. Теміржолшылар үшін тазалық жұмыстары тек сенбілікпен шектелген емес. «Таза бейсенбі» акциясы да мекемеде неше жылдан бері дәстүрлі түрде ұйымдастырылып отырады.
Қазақстан темір жолы ғимаратының айналасы – жергілікті тұрғындардың сүйікті серуен орны. Қазақтың батыр қызы Әлия Молдағұлова атындағы даңғылда орналасқан теміржолшылар ғимаратының алдында шағын сквер бар, жаз бойы субұрқақ салқындатып тұрады. Балалар алаңы да бар. Кешкілік қаланы безендірген жарық шамдар бұл жерге ертегілер әлеміндей ерекше сән береді. Сондықтан теміржолшылар ғимаратының алды күндіз де, түнде де қала тұрғындарына толы.