Ақтөбе филиалына биыл 2,5 мың вагон көмір жеткізілген
Ақтөбе облысы бойынша меншікті тілші
«ҚТЖ-Жүк тасымалы» ЖШС Батыс аймақтық филиалы биылғы жылғы 10 айда 2500 астам вагон көмір түсірген. Оның 300 вагоны коммуналдық-тұрмыстық көмір.
Алты ай қыс болатын Ақтөбе өңірінде көмір тасымалы негізінен теміржол арқылы атқарылады. Биыл да қатты отын тасымалдау жұмыстары жоспарға сай орындалуда.
«ҚТЖ-Жүк тасымалы» ЖШС Батыс аймақтық филиалы логистика және жүк тасымалы бөлімінің инженері Лаура Әлжанованың айтуынша, осы жылдың 10 айлық қорытындысы бойынша Ақтөбе филиалына 176 802 тоннаны құрайтын 2586 вагон көмір келген. Соның ішінде тұтынушылардың коммуналдық-тұрмыстық қажеттілігіне 295 вагон болатын 20 499 тонна көмір бар.
«Жылжымалы құрам саны қажетті деңгейде жеткілікті. Коммуналдық-тұрмыстық көмір тасымалы үшін ашық вагондар қолданылуда. Жеткізу, түсіру жұмыстары уақытылы ұйымдастырылып отыр», – дейді Лаура Әлжанова.
Сонымен қатар, осы он айда Ақтөбеге 1959 вагонмен 133 699 тонна өндірістік көмір, 268 вагонмен 18 197 тонна шаруашылық көмір және темір жол ұйымдары үшін 64 вагонмен 4407 тонна қатты отын жеткізілген. Түсіру жұмыстары Әйтеке би, Ақтөбе, Жіңішке, Қандыағаш, Қарауылкелді, Мәртөк және Шалқар станцияларында, көтеріңкі кіреберіс жолдарында екі бағытта ұйымдастырылған. Қысқасы, Ақтөбе биыл көмір тапшылығын сезінбейді деген сенім бар.