Маңғыстау электрмен жабдықтау дистанциясының көрсеткіші жоғары

Маңғыстау электрмен жабдықтау дистанциясы биылғы үш тоқсанда бірталай шаруаның басын қайырды. Апатты жағдайдың алдын алуға байланысты жөндеу жұмыстары толықтай орындалған. Ақауы шыққан желілер жөнделіп, тозығы жеткен құрылғылар жаңартылған.

Нәтижесінде электрмен жабдықтау сапасы, пойыздардың қозғалыс қауіпсіздігі жақсарып, АЛСН, СОБ ақаулары мүлде тіркелмеген. Дистанция жұмысшыларының еңбек жағдайын жақсарту, жұмыс құралдарымен қамту да жоспарға сай орындалып отыр. Қажетті диэлектрлік қолғаптар, айырғыштар, изоляторларды (ШФ-10, ШС-10 ) оқшаулағыштар, сигналдық кеудешелер, арнайы киімдер мен қорғаныс құралдары жеткілікті мөлшерде алынған.  

Сонымен қатар, «Инвест бюджет» жоспары бойынша Маңғыстау электрмен жабдықтау ауданы, РРУ Маңғыстау, РММ, Сайөтес, Жаңаөзен, Бейнеу, Бейнеу – Тассай, Бейнеу – Оазис электрмен жабдықтау аудандары түгел кондиционер, шкафтар және бойлерлермен қамтамасыз етілген.

– Маңғыстау магистральдық желі бөлімшесіне қарасты Маңғыстау электрмен жабдықтау дистанциясының жалпы аумағы 4 учаскеге бөлінеді. Олар – Болашақ – Жаңаөзен – Маңғыстау, Бейнеу – Маңғыстау, Бейнеу – Тассай, Бейнеу – Оазис. Дистанцияда 8 цех бар, олар Маңғыстау, Сайөтес, Жаңаөзен – Бейнеу, Бейнеу – Тассай, Бейнеу – Оазис телімдерінде орналасқан. Аталған цехтардың барлығы да күзгі комиссиялық тексерістен жақсы баға алды, пойыздар қозғалысы қауіпсіздігі бойынша да дистанция көрсеткіші жоғары, – дейді Маңғыстау электрмен жабдықтау дистанциясының бастығы Сұлтанбек Қонаев.  

Жұмысшылар кесте бойынша жыл он екі ай үзбей біліктілігін арттыру курстарына қатысып, ай сайын өтетін техникалық сабақтарда да білімдерін жетілдіре түсуде. Бүгінде олардың барлығы KTZ HSE ISPB мобильдік қосымшасына тіркелген. Яғни, қосымшаны 2020 жылдан бастап кеңінен пайдалануда. Айтуларынша, қосымша олар үшін ең негізгі ақпарат алу, соңғы жаңалықтардан хабардар болуы, керек нұсқаулықтарды табу, кемшіліктерді тіркеп, ортаға салып талқылауға таптырмас құрал болып тұр.  

Дистанция басшысы мекемеде техникалық қауіпсіздік және еңбекті қорғауға ерекше назар аударылатыны формальді нәрсе емес дейді. Өйткені электр мамандары өмірінде тек бір рет қана қателеседі. Ал ол қателіктің зардабы өте ауыр болуы мүмкін... Сондықтан дистанцияда қауіпсіздік семинарлары, жас мамандарға тәжірибелік дәрістер жиі ұйымдастырылып тұрады. Мысалы, жуырда дистанциядағы барлық электрмен жабдықтау ауданының жұмысшылары қатысқан семинар өтіп, кәсіби шеберліктерін шыңдау сынағында Бейнеу – Тассай ЭЖА ұжымы энергетика саласындағы қорғаныс құралдарын түгендесе, Бейнеу ЭЖА қызметкерлері бағана үстінде тоққа түскен адамға жәрдем беру шараларын көрсеткен. Ал Бейнеу – Оазис ұжымы қалай жылдам әрі қауіпсіз алғашқы медициналық көмек жасау қажеттігін түсіндірген. Жаңаөзен ауданының жұмысшылары нарядпен қауіпсіз жұмыстарды ортаға салған.