Түбек теміржолшылары зейнетке шыққан әріптестеріне құрмет көрсетті

Маңғыстау техникалық қызмет көрсету пунктінің қызметкері Галима Қайырова құрметті зейнет демалысына шықты.

Қырық жылға жуық өмірін осы мекемеде өткізген жанды түбек теміржолшылары зейнетке салтанатпен шығарып салды, әсіресе жастар жағы «жұмыстағы аналарымен» қимай қоштасты.  

Галима Қайырқызы 1962 жылы Түркіменстанда туған, ерлі-зайыпты Мамбет пен Сәнім «сигналистер» болған екен. 1980 жылы жары Жұмабек Якупбаевты жолықтырып, отау құрған екі жас қол ұстасып атажұртқа келеді. 1984 жылы Маңғыстау вагон депосына слесарь болып орналасқан Галима уақыт өте келе вагон қараушы, жөндеуші де болады. Таңның атысы, күннің батысы демей құрал-сайманын асынып, түзде жүрді. Бірнеше жылдан соң операторлық қызметке ауысып, міне, зейнет жасына жеткенше еңбек етті.  

Құдай қосқан қосағымен өмірде ғана емес, жұмыста да жұптары жазылмай біраз жыл бірге жүрді. Ол кісі де вагон шаруашылығының маманы, ТҚКП бастығы болды, ертерек өмірден өтті. Жан жары дүние салған соң артында қалған төрт ұлы мен екі қызына, немерелеріне бас болып қалды. Ұлдарының төртеуі де ата-ана ізімен теміржолшы мамандығын таңдады. Тұңғышы Жеткізген қозғалыс қауіпсіздігінің бас маманы болса, екінші ұл Жалғасқан пойыздар қоғалысының диспетчері. Бұл шаңырақтың атын бүкіл Қазақстан темір жолына танытқан кенже ұлы Жанарбек, жас болса да бірнеше рет «Қозғалыс қауіпсіздігі үшін» төсбелгісімен марапатталған маңғыстаулық вагон қараушы көпшіліктің есінде болар.  

– Соншама жыл күнделікті әдет болып қалған жұмыстан қол үзуге үйрену қиын шығар, дегенмен бұл күнге жеткізген Аллаға шүкір деймін. 23 желтоқсаннан бастап зейнетке шығып жатырмын. Ендігі уақытты немерелердің тәрбиесіне арнап, балаларыма көмектесемін, – дейді аяулы ана.

Галима Қайыроваға ұзақ жылғы қажырлы еңбегі үшін алғыс айтқан бөлімше бастығы Нәжімеден Ғұбашов оның өнегелі өмірін жастарға үлгі етті.