Маңыстауда салауатты өмір салтын насихаттайтын акция өтті
Маңғыстау облысы бойынша меншікті тілші
Салауатты өмір салтын қалыптастыру бағытында теміржолшылар арасында өтіп жатқан «Никотинге – витамин» акциясы Маңғыстау теміржолында да ұйымдастырылды.
Эстафетаны атыраулық әріптестерінен қабылдаған түбек теміржолының Бейнеу станциясындағы теміржолшылар арасында да никотинді витаминге ауыстырғандар болды.
Адам денсаулығы үшін маңызы орасан бұл шараны Бейнеу станциясындағы спорт нұсқаушысы Бегзад Нұралиев ұйымдастырды. Бір топ белсенді жас станция, локомотив айналым депосы мен вагон депосы, электрмен жабдықтау, байланыс және белгі беру дистанцияларының жұмысшыларын аралап жүріп, акцияның мәнін түсіндірді. Темекі тартуға шыққандар мен соған әуестенген жұмысшыларға зиянды көк түтінді себеттегі алма, апельсин сияқты жемістерге айырбастауға ұсыныс білдіріп, өз өміріне бей-жай қарамауға шақырды. Әрине, темекімен қоштасуға дайын еместер де кездесті. Біреулер бір талын, енді басқасы бір қорабын мыжып тастап никотиннің орнына витаминді таңдады. Бәз-біреулер осы шара сылтау болып, көптен құтыла алмай жүрген зиянды әдетінен арылуға тырысатындарын жеткізді.
Алдағы уақытта акция Маңғыстау станциясында белсенді жастардың ұйымдастыруымен жалғасын таппақ.