Өткелдер мәселесі өткір тұр...

Семей Жүк тасымалы мен Магистральдық желі бөлімшесі бойынша теміржол өткелдерін барлық талапқа сай ету, соның ішінде асфальт жабындысын тексеру жұмыстары қолға алынуда.  

Жуырда қос бөлімше басшылары Владимир Бабиченко мен Айдын Шәукежанов бастаған арнайы топ қала ішіндегі жол өткелдерін аралап, техникалық ахуалын тексерді. Бөлімше бойынша тұңғыш рет кең көлемде ұйымдастырылып отырған   комиссиялық бақылауға жол, белгі беру және байланыс дистанциялары басшылары, мамандары және желілік полиция мен облыстық, қалалық әкімдіктің автомобиль жолына жауапты өкілдері қатысты.  

Тексеруші топ негізінен жол өткелдеріндегі асфальт жабынына назар аударды. Жалпы, осыған дейін мұндай орындарда, яғни рельстер аралықтары мен түйіспелері маңында теміржолшылардың өз күшімен ғана жеңіл-желпі жөндеу жұмыстары жүргізілген. Алайда, жол төсемі бүгінгі күндері әбден тозғандықтан шұңқырларды жамап-жасқаудың өзі мүмкін болмай барады. Үгітіліп, ойдым-ойдым бола бастаған мұндай орындарға қалалық әкімдік тарапынан ешқандай күрделі жөндеу жүргізілмейді. Сол себепті кейбір жол өткелдері теміржолшылар қауымының алаңдаушылығын тудыра бастаған. Оның үстіне бүгінде автокөлік ағыны артып, жолға түсетін салмақ та әлдеқайда ұлғайған.

Өткелдер кезекшілері рельсті жол үстімен өтетін автокөліктер шұрық-тесігі шығып жатқан жолдан өтерде жүре алмай, кібіртіктеп қалатынын айтады. Мұның арты бір күні қайғылы жағдайға апарып соғуы әбден мүмкін деседі олар.    

Тексеру барысында анықталғандай, көліктер ағыны толас таппайтын Семей қаласының ішіндегі он шақты жол өткелдеріне жаңадан асфальт жайып, кейбірінің тозығы жеткен төсеніш резиналарын ауыстыру қажет екендігі нақтыланды.  

– Анықталған кемшіліктерді жойып, мәселені  уақыт оздырмай жергілікті атқарушы билікпен бірлесіп шешу қажет. Бүгінгі көшпелі тексеру жұмыстарының негізгі мақсаты да сол, – деді бұл орайда пікір білдірген бөлімше басшысы Владимир Владимирович.  

Тексеру қорытындысы бойынша бірқатар шешім қабылданды: Семей магистральдық желі бөлімшесі басшылығы үш күн ішінде қаладағы теміржол өткелдерінің техникалық ахуалы және де оларды жөндеуге қажетті материалдар бойынша арнайы хаттама әзірлеуі тиіс. Сондай-ақ, Абай облысы әкімі орынбасарының қатысуымен арнайы кеңес өткізіліп, теміржол өткелдерін талапқа сай ету жайы кең көлемде талқылануы тиіс.