Жамбыл вагон пайдалану депосында кәсіби үздіктер анықталды
Тараз қаласы бойынша меншікті тілші
Жамбыл вагон пайдалану депосында техникалық қызмет көрсету бекеті қызметкерлері, яғни вагон қараушылар арасында «Өз кәсібінің үздігі» байқауы өтті.
Оған Шу, Түрксіб, Жаңатас, Қаратау, Тараз станцияларындағы техникалық қызмет көрсету бекетінде еңбек ететін алты вагон қараушы қатысты. Байқау комиссиясының төрағасы, депоның бас инженері Сағидулла Абиевтің айтуынша, мамандарды практикалық дайындау шаралары жиі ұйымдастырылып, техникалық оқуларда олардың тәжірибесі шыңдалады. Осындай байқаулар да вагоншылардың білім-біліктілігін арттырып, өзара тәжірибе алмасуға сеп болмақ. Байқауда мамандар бірінші кезеңде тест сұрақтарына жауап берсе, екінші кезеңде полигонда құрылғылар қандай мақсатта пайдаланатынын тәжірибе түрінде көрсетті. Нәтижесінде барлық сынақтан сүрінбей өткен Мавлюдбек Бурсалов (Шу) бірінші, Нұрислам Жайсан (Түрксіб) екінші, Марат Кесікбаев (Жаңатас) үшінші орынды иеленді. Жеңімпаздарға кәсіподақ тарапынан дайындалған сый-сияпаттар табыс етілді.
