Бейнеуде Теміржолшылар күні ерекше аталып өтті
Маңғыстау облысы бойынша меншікті тілші
Биыл көлік қызметкерлерінің кәсіби мерекесі Маңғыстау теміржолының Бейнеу станциясында ерекше атап өтілді.
Бейнеу жол дистанциясы басшылығы және кәсіподақ ұйымының ұйытқы болуымен аудандық мәдениет үйінде концерттік бағдарлама ұйымдастырылып, теміржолшылар марапатталды.
Тоғыз жолдың торабында орналасқан, зейнетінен бейнеті көп Бейнеуде жұмыс істейтін теміржолшылардың, әсіресе жол мамандарының еңбегі ерең. Сол еңбек адамдары бұл күні ұлықталып, бір сәтке болса да тынығып, көңіл көтерді.
Шалғайдағы әріптестерін құттықтап, қуанышына ортақтасуға Маңғыстау қосалқы бөлімінің бастығы Нәжімеден Ғұбашов пен Орталық кәсіподақ ұйымының Маңғыстаудағы өкілі Сәрсенбай Есенқұлов та барды. Бейнеулік жұмысшыларға жүрекжарды ақ лебізін арнаған олар еңбегіне табыс тілеп, саланың өркендеуі жолында қосып жүрген үлесіне алғысын айтты.
Үздік қызметкерлерге түрлі деңгейдегі марапат пен сыйлықтарды табыстады. Теміржолшылар күніне орай аталған шарадан бөлек спорттық жарыстар да өткен еді. Осы күні оның да жеңімпаздарының аты аталып, сый-сияпатқа бөленді.
Аталған іс-шараны Бейнеу жол дистанциясының бастығы Ерназар Ізтұрғанов пен дистанцияның кәсіподақ ұйымы төрағасы Мұстафа Қожбанов жоғары деңгейде ұйымдастырып, тартымды өтуіне атсалысты.
