Үздік вагон қараушы анықталды

Қазалы вагон пайдалану депосының теміржолшылары аймақтағы үздік вагон қараушыны анықтады. Мұндай доданың талайында нағыз вагон қараушыға тән қырағылықпен айласын асырып, озық тәжірибесін көрсете білген Қызылорда техникалық қызмет көрсету бекетінің вагон қараушы-жөндеушісі Рысбек Оразалиев жүлделі 1-орынды қанжығалады.  

Компанияның Қызылорда ЖТ бөлімі мен Қауіпсіздік департаментіне қарасты Қызылорда учаскесінің ревизорлар аппараты басшылығымен бірлесіп  ағымдағы жылда қозғалыс қауіпсіздігін нығайтуға арналған профилактикалық шаралар жүргізу жоспары бойынша депоның үздік теміржолшылары арасында «Үздік вагон қараушы» сайысы өтті. Биыл Түркістан мен Сексеуіл станциялары арасындағы депоның вагондарды бақылау пункіттерінде жұмыс жасайтын вагон қараушы-жөндеушілердің ішінен ең үздік, ең тәжірибелі әрі ең білімді деген 8 үміткерін Қазалы станциясындағы депо орталығына жолдаған вагоншылар әріптестерінің байқауда бағы жанып, ең үздігі болуына жанкүйер болып, қолдау көрсетті. Депо бастығы Арғын Орымбаев, кәсіподақ ұйымының төрағасы Бақытжан Ибрайым, басшы орынбасарлары мен тәлімгер, инструкторлардың 2 сатылы сынағына түскен вагон қараушылардың барлығы жинаған тәжірибелерімен бөлісіп, теориялық білімін дәлелдеп шеберліктерін байқатты.

– Бүгінгі екі турдан тұратын үздіктер сынағына қатысқан вагон қараушы-жөндеушілер шын мәнінде депоның мақтаныштары. Олар осыған дейін өздері жұмыс жасайтын бақылау бекеттерінен ақаулы вагонды өткізбей таба білген тәжірибелі теміржолшылар. Алғашқы турда теориялық білім сынға салынды. Екінші емтихан кезінде ағымдық жөндеу тұйығында (АЖТ) тұрған №24474280 вагонының тахникалық жағдайын қарап, оның техқұжатқас сәйкес емес тұстарын практикалық тұрғыдан анықтады. Бұл вагон қараушының бекетке аялдаған вагондарға күнделікті техқызмет көрсету әрекеттері сараланған сынақта үміткерлердің барлығы шеберліктерін дәлелдей білді. Пойыздардың қозғалыс қауіпсіздігін нығайтуға арналған профилактикалық шаралар санатындағы мұндай сынақтар әріптестерімнің өз кәсібін жан-жақты меңгеруге машықтандыра түседі, – деді байқаудың қазылар төрағасы, депо бастығы Арғын Орымбаев.

Сынақ нәтижесінде Шиелі техникалық қызмет көрсету бекетінің вагон қараушы-жөндеушісі Табиғат Абдураев жүлделі 3-орынды иеленді. Қазалы ТҚКБ вагон қараушы-жөндеушісі Серік Шаден жүлделі 2-орынға шықса, өзгелерден өз тәжірибесі мен біліктілігімен асып түскен Қызылорда ТҚКБ вагон қараушы-жөндеушісі Рысбек Оразалиев жүлделі 1-орынды қанжығалады. Мұнан бөлек Сексеуіл станциясындағы техқызмет көрсету бекетінен Қайырбай Нұрсейтов, Болатбек Сансызбаев, қазалылық Айбек Қараманов, Нұрсұлтан Бақытжанұлы, Тереңөзектегі бақылау бекетінен Александр Абдураймовтар да өз кәсіптерінің үздіктері болуға лайық екендіктерін дәлелдеді. Сынға қатысушарлар мен жүлдегерлерге депо басшылығы мен кәсіподақ ұйымы атынан дипломдар мен сыйлықтар табысталды.