Қоғамдық қызмет – абыройлы міндет

ҚР Кәсіподақтар федерациясының «Еңбек озаты» төсбелгісімен марапатталған Бейнеу жол дистанциясының инженер-метролог, эколог маманы Мұстафа Қожбанов – кәсіби қызметіне қоса мекеменің кәсіподақ ұйымының төрағасы ретінде қоғамдық қызметті де үлкен абыроймен атқарып отырған теміржолшы.

Еңбек жолын отыз жылдан астам бұрын теміржолдағы құрылысшылар бригадасында бастаған кейіпкеріміздің әу бастағы мамандығы құрылысшы. 2000 жылға дейін құрылыс шебері болып, теміржолшыларға салынатын үй мен теміржол ғимараттарын жөндеп, салумен айналысатын бригадада еңбек етті. Десе де, теміржолшы отбасында туып өскен ол өз болашағын бәрібір теміржолмен байланыстырды. Бригада тараған соң жол дистанциясына ауысып, сырттай оқып білімін жетілдірді. Инженер-метролог, эколог кәсібіне маманданды. Жұмысына тап-тұйнақтай тындырымды, ұжымның кез келген мәселесіне білек сыбана кірісіп кететін еті тірі жігітті 2008 жылы дистанцияның кәсіподақ ұйымын басқаруға сайлаған әріптестері ұтқаны анық. Содан бері негізгі қызметінен бөлек дистанция жұмысшыларының жоғын жоқтап жүрген ұйым төрағасы жолшылардың көңілінен шығып келеді. Еңбек даулары мен жалақы, түрлі әлеуметтік мәселелердің шешілуіне күш салып, әріптестерінің алғысына бөленуде. Кәсіби қызметі барысында «Үздік маман», «Адал еңбегі үшін» төсбелгілеріне ие болса, өткен жылы ҚР Кәсіподақтар федерациясының «Еңбек озаты» марапатын алды.  

Мұстафа Қожбановтың тікелей күш салуымен дистанция жұмысшыларының біраз мәселесі оң шешімін тауып отыр. Мәселен, соңғы жылдары Бейнеу-Тассай бағытында вахталық әдіспен жұмыс істейтіндер үшін толық жабдығымен 80 дана төсек-орын алынып, кейбір мамандардың еңбек демалысына қосымша күн қосылды. Бейнеулік жолшылардың Маңғыстау станциясындағы жолшылармен бірдей тарифтік сетка бойынша жалақы алуы мәселесінде де жұмысшылар ұсынысын жоғарыға жеткізіп, қолдан келгенін аянып қалмады.  

– Ақаутапқыш арбашалар операторларының еңбек демалысына қосымша 6 күн қостырдық. 12 тоннадан артық салмақтағы автомобиль жүргізушілері мен бригадирлердің жұмыс орнына кәсіподақ арқылы тәуелсіз эксперт шақыртып, аттестация өткіздік. Жұмыс орны қайта қаралып, еңбек демалысына қосымша күн қосылатын болды. Үнемі түзде жүретін жолшылар үшін әр жерде жылынып, тамақтанатын орындар болуға тиіс. Бейнеу – Тассай телімінде сондай үйшік жоқ. Кейбір учаскелерде өте ескі. Оларды жаңарту керек. Қазір осы жұмыспен айналысудамыз, – дейді кейіпкеріміз.  

Сонымен қоса ол мекемедегі инженерметролог, эколог маман ретінде де біраз шаруаны ширатып отыр. Мекемедегі құрал-саймандардың жарамдылығын тексеріп, қолданысын қадағалау, автотехниканың бөлшектері мен түрлі аспаптарына ревизия жүргізіп, экология мәселесін үнемі бақылауда ұстайды.