Сексеуіл жол дистанциясына жаңа техника келді (Фото)
Қызылорда облысы бойынша меншікті тілші
Қызылорда магистральдық желі бөлімшесіне қарасты Сексеуіл жол дистанциясына Ресейде шығарылған су жаңа МПТ-6/869 мотовозы келді.
Борт компьютерімен, жылыту, салқындату жүйе- сімен және тағы басқа заманауи құрылғылармен жабдықталған заманауи техника жолшылар ұжымын қуантуда.
– Қолданылу мерзімі 30 жылға есептелген техника бұған дейінгі мотовоз машинисі болған білікті маман Елдос Қалдыбаевқа сеніп тапсырылып отыр. Қай телімде жұмыс болатын болса, мотовоз сол жерге жіберілетін болады. Бізді су жаңа техникамен қамтамасыз етіп отырған компания мен бөлімше басшылығына алғысымыз шексіз, – деді дистанцияның бас инженері Елдос Жеткербайұлы.
Сексеуіл жол дистанциясы үшін Сексеуіл – Қоскөл жаңа телімінде жолдың бабын жасау үлкен салмақ болып отыр. Жолдың бабын технологиялық талапқа сай ұстап тұру, бұл аумақтың бархан құмды жоталар арасынан салынғанын ескерсек оңай емес, үздіксіз соққан желдің әсерінен жолды құм басып қалуы әп-сәтте, жолшылар жұмысы ауыр, техниканың күшін көп қажет етеді.
– Дистанцияда 1978 жылы және 2012 жылы шыққан мототехникалар қолданыста жүр. Оларды жаңа техникамен салыстыруға келмейді. Ал мына су жаңа мотовоз жолшылардың барлық сұранысына жауап береді. Тіпті заманауи бейнекамералармен қамтамасыз етілген, бұл дистанция ашылған жеті жылдың ішінде алған алғашқы жаңа техникамыз, – деп қуанышымен бөлісті дистанцияның бас механигі Жорабек Сматуллаев.
Су жаңа техниканың құлағын ұстаған тәжірибелі машинист Ербол Қалдыбаев та дән риза.
– Мотовоздың бұған дейін қолданыста болған МПТ-лардан айырмасы бұрынғыларда тартылым күші гидроберіліс болса, мұнда генератор арқылы жұмыс жасайтын электроберіліс, барлығы борт компьютер арқылы жұмыс істейді. Өртке қарсы тетігі жүйеге қосылған, 2КБ желілік рациясы, бейне бақылау секілді заманауи байланыс жүйесімен, тұрмыстық қажеттіліктермен жабдықталған, – деп әсерімен бөлісті.
