Бейнеулік теміржолшылар аудан әкімдігінің марапатына ие болды (Фото)
Маңғыстау облысы бойынша меншікті тілші
Бейнеу ауданының тарихы темір жолмен тығыз байланысты. Оның өркендеуі мен дамуы жолында теміржолшылардың еңбегі зор. Жуырда отыздан астам теміржолшы аудан әкімдігінің марапатына ие болды.
Тәуелсіздік мерекесіне орай Бейнеу станциясының әкімшілік ғимаратында өткен жиында аудандық мәслихаттың төрағасы Ардақ Бораш пен «AMANAT» партиясы Бейнеу аудандық филиалының төрағасы Тұралы Жолышов 35 теміржолшы-ардагерді «Бейнеу ауданына 50 жыл» төсбелгісімен марапаттады. Олардың ауданның әлеуметтік-экономикалық дамуы жолында атқарып жүрген еңбегіне алғыс айтты.
Марапатталған ардагер теміржолшылардың қай-қайсысы да бүкіл өмірін осы салаға арнаған жандар.
– «Марапат мерейді өсіреді» демекші, бұл төсбелгінің иегері болған жандардың бәрі де құрметке лайық. Мысалы, Жарылқасын Батыров біраз жыл Бейнеу станциясында бастықтың орынбасары, Қарақалпақия түйіспе станциясында да бастықтың орынбасары қызметін атқарды. Тамадин Маштанов ағамыз болса өмірінің 40 жылын осы станцияда өткізіп, бас инженер лауазымынан зейнетке шыққан. Наргүл Оразбаева апамыз 30 жылдан астам еңбек етіп, техникалық орталықтан зейнетке шыққан. Хыдырбай Жаңабаев 41 жыл бойы станция кезекшісі болған. Біз бұл аға-апаларымызды мақтан етеміз, олардың өмір жолы – жастарға үлгі, – дейді Бейнеу станциясының бастығы Есет Хайруллин.
