Шиелі теміржолшыларына Ұжымдық шарт түсіндірілді
Қызылорда облысы бойынша меншікті тілші
Биыл жұмыс беруші мен жұмысшы арасындағы тең құқық пен әлеуметтік талаптар түзілген жаңа Ұжымдық шарт қабылданды. Қызылорда бөлімшесінде осынау әлеуметтік-құқықтық құжатты теміржолшылар арасында түсіндіру жүмыстары жүргізілуде.
Қызылорда ЖТ бөлімінің бас инженері Күлхан Белкібаев пен кәсіподақ ұйымының төрағасы Мұхтар Көпірбаев бастаған жұмыс тобы осы аптада Шиелі станциясында тораптық жиын өткізіп, еңбек ұжымдарымен кездесті. Станция жұмысшыларынан басқа Қызылорда локомотив пайдалану және Қазалы вагон пайдалану деполарының Шиелі станциясындағы филиалдарының теміржолшылары қатысқан жиында 2024-26 жылдарға арналған жаңа Ұжымдық шартқа енгізілген өзгерістер жан-жақты таныстырылды. Көпшіліктің сауалына бас инженер, экономика және кадр бөлімінің мамандары мен заңгер жауап берді.
Тораптық жиын барысында Ұжымдық шартты талқылап-түсіндірумен қатар еңбек ұжымдарындағы ішкі-сыртқы жағдайлар да сөз болып, өткен жылдың қорытындысы сараланды. Сонымен қатар Шиелі-Шорнақ учаскесінің қосалқы кезекшісі Әбдірахым Бекежановты зейнет демалысына шығарып салу рәсіміне кезек беріліп, бөлім басшылығы мен кәсіподақ ұйымы атынан адресат тапсырылып, иығына шапан жауып құрметке бөледі.
