Болашақ теміржолшылар білімін шыңдауда
"Қазақстан теміржолшысы" газетінің Жамбыл облысындағы меншікті тілшісі
Тараз көлік және коммуникация колледжі дуалды білім беруді дамыту үшін «ҚТЖ-Жүк тасымалы» ЖШС филиалы Жамбыл ЖТ бөлімшесін әлеуметтік серіктес ретінде таңдаған.
Қос тараптың өзара байланысы болашақ теміржолшылардың білімін арттырып, кәсіби білімін шыңдай түсуіне мүмкіндік беретіні сөзсіз. Былтыр оқу орнының материалдық-техникалық базасы айтарлықтай жаңартылды. Осы мақсатқа 27946702,06 теңге қаражат бөлініп, практикалық сабақтарға қажет жаңа жабдықтар кешені, жаңа технологиялар мен құрылғылар сатып алынған.
– 2023-2024 оқу жылында 600 мың теңгеге жуық қаржыға «ТЭМ2 тепловоз жабдығының орналасуы» электрленген стенд, 2 миллион теңгеден астам қаражатқа «Асинхронды қозғалтқыш» қолданбалы макетін және «2ТЭ10М тепловозының 10Д100 дизель-генераторы» стендін, «Бағдаршам сигнализациясы» кешенін сатып алдық. Олар қазір тәжірибелік сабақта қолданылуда. Бұдан бөлек LED экран және жалпы білім беретін пәндер бойынша оқулықтар мен кәсіптік, ғылыми әдебиеттер алынды. Кітап қоры айтарлықтай көбейді. Басқа да кәсіптік бағыттағы мамандарды даярлауға қажетті құрылғыларды, жабдықтарды жаңарттық. Әлеуметтік серіктестермен тығыз байланыста жұмыс жүргіземіз. Олардың қатарында Жамбыл ЖТ бөлімшесі мен «Қамқор Локомотив» ЖШС бар. Колледждің қамқоршылар кеңесінің құрамына да теміржол саласында еңбек етіп жүрген тәжірибелі қызметкерлер мен мамандарды тартқанбыз. Жақында осы кеңес алдында атқарылған жұмыстар бойынша есеп бердім, – дейді Тараз теміржол көлік және коммуникация колледжінің директоры Ұлжан Кенжебаева.
Колледж 9 мамандық бойынша кәсіптік білім береді. Оның негізгі 5 бөлімі болашақ теміржолшыларды даярлауға бағытталған. Оның ішінде «Теміржолдың жылжымалы тартқыш құрамын пайдалану, жөндеу және техникалық қызмет көрсету», «Автоматика, телемеханика және теміржол көлігіндегі қозғалысты басқару», «Теміржолдың вагондар мен рефрижераторлы жылжымалы құрамын пайдалану, жөндеу және техникалық қызмет көрсету» және «Теміржол көлігінде тасымалдауды ұйымдастыру және қозғалысты басқару», «Жылжымалы құрам» полигонын және станция кезекші постын жабдықтауға қажетті материалдар» мамандықтары бар. Бүгінде оқу орнында 545 студент білім алуда. Басым бөлігі мемлекеттік тапсырыс бойынша оқып жатыр.
