Шымкентте «100 жас есім» жобасы аясында модульдік оқу күндері өтті

Шымкентте «ҚТЖ» ҰК» АҚ-ның «100 жас есім» жобасы аясында алғашқы модульдік оқу күндері өтті. «Алма тау» сауықтыру орталығында 3 күнге жалғасқан оқу-әдістемелік жиынға республика аумағынан 80-ге жуық жас теміржолшы қатысты.

Басқосудың басты ұйымдастырушысы Әлеуметтік саясат департаментінің жетекшілері мен жауапты мамандары болды. Мекеме менеджері Жақсылық Молдақұловтың айтуынша, алдын ала бекітілген тақырыптық бағдарлама аясында салада еңбек етіп жатқан белсенді жастарды кәсіби тұрғыда ғана дамытып қоймай, азамат ретінде де өзін-өзі өсіру көзделеді. Сондай-ақ жоба аясында қатысушыларға уақыт талабы мен заман ағымына сай озық үлгідегі технологиялық және әдістемелік жобалар таныстырылып, жүзеге асыру тетіктері талқыланды. Атап айтқанда сапа менеджементінің жүйесі (СМЖ) бойынша ішкі оқытулар мен жобаларды басқарудың тиімділігі, жобаны жүзеге асыру кезіндегі өзгерістер мен жоба жетістігі талқыланып, практикалық сабақтар өтті.  

Ал панельдік сессиялар форматында «100 жас есім» жобасының 9 өкілі спикер ретінде өз тәжірибелерімен бөлісті. Мысалы, «100 жас есім» жобасы аясында тұлғалық даму әлеуетін аша білген Махамбет Кенжеғараевтың қызметтік карьерасы да өскен. Ол бұл жиынға станция бастығы ретінде қатысып, өзінің ой-пікірін ортаға салды.

– Мұндай басқосулар адамның көшбасшылық қабілет-қарымын дамыту үшін өте қажет деп санаймын. Одан бөлек, бұл жоба теміржолшылар арасында білім-білігі жоғары әрі белсенді көшбасшылар легінің қалыптасуына оң әсер етеді, – дейді ол.

Сонымен қатар Автоматтандыру және цифрландыру дирекциясының IT-серіктесі Ілияс Ахметов жобаларды басқару мен іске асыру тетіктері туралы айтты. Сол сияқты Ақтау теңіз портының еңбек қауіпсіздігін қорғау және өндіріс инженері Салима Баубекова, «Жолаушылар тасымалы» АҚ жолсерігі, «Темір аю» жобасының жетекшісі Диана Бимбетова, Көпсалалы қызмет көрсету орталығы Семей станциясы бойынша филиалдың аймақтық есепке алу тобының жетекшісі Мәди Нұртаев, «ҚТЖ-Жүк тасымалы» ЖШС «Батыс» филиалы Маңғыстау бөлімшесінің өндірістік қамтамасыз ету секторының инженер-технологы Асхат Шарапатдинов, Шымкент магистральдық желі бөлімшесі филиалының қозғалыс қауіпсіздігі бөлімінің бас маманы Назарбай Ыбышев сынды жастар жиынға белсенді қатысып, өз тәжірибелерін ортаға салды.  

Басқосу қорытындысы бойынша модульаралық жұмыстар аясында командалық жобаларды келесі модульге дейін сүйемелдеу жүргізілетін болып шешім қабылданды. Яғни тапсырмаларды тиянақтау мен даму прогресін зерделеу, мобильді топтармен кеңесе отырып, проблемалық түйіндерді тарқату тетіктері іске асырылады. Оған қоса жиын қатысушылары 15 командалық топ ретінде қолға алған жобалар 3 ай бойы трекер-сарапшылар тарапынан сүйемелденеді. Осы мақсатта трекер-сарапшылар мен командалардың айына 2 реттен 3 айда 6 кездесу өткізу жоспарланған. Айта кетейік, «100 жас есім» жобасының келесі басқосуы мамыр айында өтеді деп күтілуде.