Қосалқы бөлшектер жетіспеушілігі шешілуде

Атырау вагон пайдалану депосында бүгінде жағдай біраз ілгерілеп, материалдық-техникалық базасы нығайып келеді. Деподағы күрмеулі мәселенің бірі – қосалқы бөлшектердің жетіспеушілігі болатын. Бұл мәселе біртіндеп шешіліп келеді.

Мәселен, өткен жылы көптеген қаржы бөлініп, оған аяқты кран, жиынтық колодка, бұранда, құлып, тежегіш башмақтың втулкасы, ішкі серіппе, швеллер, ажыратылған кран сияқты тағы басқа көптеген қосалқы бөлшектер мен техникалық құралдар сатып алынған.

Депоның қызмет көрсету аясы Астрахань облысына таяу Ақсарай станциясынан бастап Бейнеу мен Қандыағаш аралығын қамтиды. Осы аралықтағы вагондардың дұрыс жүріп-тұруына, бұзылмай, сынбай, мүлтіксіз екінші бір станцияға дейін жетуін қадағалап, тексереді. Өткен жылдың қорытындысы бойынша депода қызметкерлердің кінәсінен апатты жағдайлар орын алмаған, сондай-ақ жұмыс барысында да тұтастай алғанда ақаулық кетпеген. Депо учаскесінде вагондардың бұзылуы немесе цистерналардан Мақат, Құлсары, Сазанқұрақ станцияларында құю барысында ВЧД-1 қызметкерлері кінәсінен сұйық жүктердің ағып кетуі болмаған. Бұл қызметкерлердің өз істеріне жіті көңіл бөліп, аса мұқияттылықпен өз міндеттерін атқаратындығын көрсетеді. Жүк пойыздарының 2 рет кідіруі орын алған, оның негізгі себептері – негізгі техникалық күтім пункттерінде техникалық ақауы бар вагондарды ағыту, техникалық дайындықтың дер кезінде болмауы, тежегіш жабдықтарының ақаулығы сияқты мәселелер. Жалпы, станцияға тәулігіне ондаған вагондар келеді. Вагон қараушылар ақауларды тапқаннан кейін техникалық күтім не қызмет көрсету  пунктіне жібереді. Бүгінде депоның 4 техникалық күтім және қызмет көрсету пункті, 2 бақылау пункті, 15 қауіпсіздік посты бар.  

«Өткен жылы КТСМ арқылы 159 646 пойыз бақылаудан өтіп, жоспар 104% құрады. Вагон буксының қызуы салдарынан 32 пойыз тоқтатылды. Жыл басынан бері келіп түскен ақаулы вагондардың жалпы саны 1 216 болса, соның ішінде 665-і ашық вагондар ағымдағы ағытып жөндеуден өтті. Олардың көбінде доңғалақтардың және тежегіштердің ақаулығы болды. Сондай-ақ жолаушы вагондары бойынша 3705 вагон орнына 6428 вагон жоспарлы жөндеуге қабылданып, оның ішінде 784 вагон қайта жөндеуге жіберілді», – дейді депо бас инженері Рашид Мусабаев.  

Ұжымда жұмысшылардың біліктілігін арттыру мақсатында және қауіпсіздікті сақтау бойынша «Купе және плацкарт жолаушы вагондарының доңғалақ жұптарын ауыстыруды практикалық түрде үйрету» тақырыбы бойынша екі күндік техникалық сабақ, «Тежегіш жабдығына – ерекше бақылау» атты айлық аясында практикалық сабақтар, әртүрлі тақырыптағы айлықтар өтіп тұрады. Оған өңірдегі Ганюшкино, Атырау, Ақжайық, Махамбет, Мақат, Сағыз, Құлсары өндірістік-техникалық қызмет көрсету (ӨТҚК) пункттерінің басшылары, нұсқаушы, техникалық оқыту шеберлері, слесарь-жөндеуші, аға вагон қараушылар үнемі қатысады.  

Депо жұмысшылары вагондарды қарау, қауіпсіздігін қадағалау, жолаушылар мен жүк пойыздарының уақытылы келуі мен кетуі, діттеген жерге ақаусыз, апатсыз жетуі үшін тер төгіп, еңбек етуде, рейтінгілік бағалау бойынша да алдыңғы лектен көрініп жүр.