Студенттер жүк тасымалы процесімен танысты
Абай облысы бойынша меншікті тілші
Семей ЖТ бөлімшесі үшін қажетті маман даярлауда жергілікті жоғары және арнаулы білім ордаларының маңызы зор. Бұл орайда қаладағы Шәкәрім атындағы университет теміржолшылармен тығыз байланыс орнатқан.
Мәселен, жуырда аталмыш оқу орнының «Логистика және тасымалды ұйымдастыру» бөлімінің 2-ші курс студенттері Семей теміржолына келіп, дәріс түріндегі практикалық сабаққа қатысты.
Айта кетсек, қазіргі таңда Семей ЖТ бөлімшесінің базасында аталмыш университет шәкірттері үшін дуальді оқыту жүзеге асырылады. Осынау шара шеңберінде болашақ теміржолшылар үшін практикалық дәрістер жиі өткізіледі. Бұл жолы студенттердің мамандықтарына сай станция басындағы қозғалыс қауіпсіздігі, жүк тасымалы процесін жүргізу басты тақырып болды.
Алғашқы кезекте жастар еңбекті қорғау және өндіріс барысындағы техникалық қауіпсіздік тақырыбымен кеңірек танысып, диспетчерлердің міндеттемелеріне қанықты. Сонымен қатар пойыз қозғалысы, маневрлік жұмыстар және жұмыс барысында жиі жіберілетін қателіктер жайлы да мағлұматтар алды. Бұл орайда бөлімшенің логистика бөлімінің жүк диспетчері, оқытушы-практик Елена Гуржий тақырып аясында арнайы танымдық дәрістер өткізді. Сабақ барысында студенттер қауымы жүк тасымалы процесіне қатысушылардың рөлін көріп, сезінуге де мүмкіндік алды. Табло жұмысымен де танысты.
Практикалық дәріс барысы көрсеткендей, нақты мысалдар болса, ақпарат та жақсы меңгеріледі екен. Бұл ретте қызмет орнында болып, үдеріс барысымен танысудың әсері бөлектігі анық. Болашақ теміржолшылар аталмыш сала қызметкерлерінің жұмысына ерекше қызығушылық танытты. Сондықтан болар, жастар тарапынан қойылған сұрақтар да көп болды.