Атырауда электр желілері жаңаруда

Атырау электрмен жабдықтау дистанциясы электр желілерін жаңғыртып, жаңартуға кірісті.

Мекеме Атырау – Мақат, Мақат – Сағыз, Атырау – Д.Нұрпейсова, Мақат – Құлсары, Құлсары – Бейнеу аралықтарындағы станцияларды және құрылғыларды ток көзімен қамтамасыз етеді.  

Қазіргі уақытта 857,6 шақырым жоғарғы вольтты ток желілерін жоспарлы жөндеу жұмыстары толығымен жүргізілді. Дистанция бойынша 105 дана ВЛ-10кВ АБ және ПЭС әуе желісі бағандары, Ганюшкино – Жолтөбе бекеттері аралығында 55 шақырым АС-35 сымы ауыстырылды, 40 дана бағандарға тіреулер қойылып бекітілді. Доссор станциясында трансформатор қосалқы станциясының төбесі жабылып, Сағыз бен Аққыстау станциясындағы аудандық электр торабының әкімшілік ғимараты ағымдық жөндеуден өткізілді. Яғни ғимарат іші заманауи құрылыс қоспаларымен әктеліп, қабырғасы мен едені керамикалық таспен қапталды.  

Сондай-ақ су желісі пластикалық құбырға, жарықтандыру жарықдиодты лампаларға ауыстырылды. Қазіргі таңда дистанция аудандық тораптарында 2024 жылға жасақталған кешенді жоспар бойынша құрылғыларды күтіп ұстау, ауыстыру жұмыстары жалғасын табуда.