Жылу қазандықтары қысқа дайын

Атырау жүк тасымалы бөлімшесінде қысқа дайындық шаралары бекітілген жоспарға сәйкес жүзеге асырылуда. Биылғы жылға 15 іс-шара жоспарланған екен. Оның ішінде алты іс-шара толыққанды орындалса, қалған 9-ы жыл аяғына дейін жүзеге асырылмақ. Жұмысшылар қысқы жұмыс киімімен және қауіпсіз аяқ киіммен толық қамтамасыз етілген.

Өндірістік-техникалық бөлім бастығы Әзиз Айжарықовтың мәліметінше, биыл жоспар бойынша  21 бірлік қазандықты дайындау қажет болса, қазіргі таңда оның 18-і іске қосылып, жұмыс істеп тұр. Қалған 3 қазандық та жөндеуден өтіп, бірер күнде қолданысқа берілмек. Елуге жуық ғимарат пен құрылыстар қыс маусымына дайындалып, теміржолшылардың алаңсыз жұмыс істеуін қамтамасыз етіп отыр.  

Екінші жартыжылдыққа арналған мақсаттар мен міндеттер қатарында қозғалыс қауіпсіздігінің бұзылу деңгейін төмендету, нөлдік жарақаттануға қол жеткізу бар. Сонымен қатар Теңдік станциясы бойынша «БатысТрансГрупп» жүк жөнелтушісімен мұнай өнімдерін тиеуді 2 281 020 тоннаға немесе тәулігіне 12 396 тоннаға жеткізу, ғимараттар мен жылыту желілеріне жөндеу жүргізу, дизель отынының шығынын азайтуына қол жеткізу көзделген. Өткен мерзімде отын-энергетикалық ресурстарды тұтыну бойынша, дизельдік отынның артық шығыны 900 тонна 655 кг құраған, нақты үлесті тұтыну 20,47 кг/өлшемді құрады. Өткен жылдың үлестік шығыны 20,93 кг/өлшемімен салыстырғанда,  549 тонна 207 кг дизель отыны үнемделді. Жалпы, пойыздың орташа салмағы 678 тоннаға төмендеуі, бос вагондар пайызы артуы, телім жылдамдығының коэффициенті 96,3%-ға төмендеуі, жанармай шығынын арттыруға әкелетін факторлар.  

«Дизель отынын көп тұтынудың тағы бір маңызды себебі Батыс өңірінде желдің екпіні 15-20 м/секундқа дейін күшейіп, ауа райы жағдайының нашарлауынан болады, бұл дизель отынының өзіндік шығынының 15%-ға өсуіне ықпал етеді» дейді маман.