Үздіктер анықталды

Шымкент магистралдық желі бөлімшесінде темір жол мекемелері мен кәсіпорындарында еңбек ететін қызметкерлер арасында «Үздік маман–2024» байқауы өтті. Екі кезеңнен тұратын байқауға оңтүстік өңірден 30 үміткер қатысып өз араларындағы кіл мықтыны анықтады. Ал 7 мамандық бойынша үздік деп танылғандар 8 аталыммен марапатталды.

Шымкент көлік колледжінде ұйымдастырылған байқаудың алғашқы кезеңінде үміткерлердің теориялық білім-біліктері сынға түсті. Яғни, 25 сұрақтан тұратын сынақта мамандардың кәсіби міндеттемелері мен атқаратын қызметіне қатысты, атап айтқанда, еңбек қауіпсіздігі, техникалық пайдалану ережелері, ұжымдық шарт талаптары мен сыбайлас жемқорлыққа қарсы күресте қолданылатын заңнамалық құқықтар және іскерлік этикалық норма талаптарына қатысты білімдері тексерілді. Осылайша, бұған дейін әр мекемеден оқ бойы озып шыққан үздіктер тест сұрақтарына жауап бере отырып, баллдық жүйе бойынша бәсекеге түсті.

– Негізінен, мұндай байқаулар шалғай учаскелерде еңбек ететін әріптестеріміз үшін тамаша ынталандыру болып табылады. Өйткені, олар байқауларда білім-білігін шыңдап, қабілет-қарымын жетілдіреді. Оның үстіне, өз ісінің нағыз мамандарын анықтау арқылы құрмет-қошемет көрсетіп, оларды қанаттандыра түсеміз. Нәтижесінде, темір жолдағы қауіпсіз қозғалыс қамтамасыз етіледі әрі осы салаға деген оң иммидж қалыптасады деп сенеміз, – дейді магистралдық желі бөлімшесі директорының орынбасары Жомарт Мырзабеков.

Ұйымдастырушылардың айтуынша, байқаудың екінші кезеңінде үміткерлер әрбір салалық кәсіп бойынша арнайы топтарға бөлініп, сұрақ-жауап, әңгімелесу арқылы практикалық талқылау жүргізілді. Соның нәтижесінде жиынтық балл қорытындысы шығарылып, қатысушылар арасынан үздіктер анықталды. Атап айтқанда, «Үздік жол монтері» номинациясы бойынша ПЧ-54 қызметкері Талант Сапар атанса, ПЧ-53 қызметкері Ермек Жұмабаев «Үздік жол шебері» номинациясымен марапатталды. Ал ШЧ-38 жұмысшысы Нұрбол Түймебеков «Үздік байланысшы», ЭЧ-24 жұмысшысы Жомарт Әбдікәрімов «Үздік энергетик», ПЧ-54 машинисті Бақытбек Құдасов «Үздік машинист», ВП-39 мекемесінің қызметкері Мейірбек Шералиев «Қалпына келтіру пойызының үздік маманы» номинациясына ие болды. Сол сияқты «Үздік өрт сөндіруші» номинациясы бойынша Сәбит Әміров, ал «Үздік вокзал қызметкері» аталымымен Арыс-2 вокзалының жұмысшысы Асылхан Күлтеков құрметке бөленді.

Байқау талабының бірнеше тетіктері бойынша ең жоғары балға ие болған Шымкент белгі беру және байланыс дистанциясының ұжымы «Үздік ұжым – 2024» атағына ие болды. Ендігі жерде әр мекемедегі қызметкерлердің ұжымдық рухын көтеріп, жұмысшыларға жігер сыйлайтын ауыспалы ту осы аталған мекемеде жыл он екі бойы желбірейтін болады.

Айта кетейік, «Қазкөліккәсіп» ҚБ Шымкент филиалының жетекшілері шара ұйымдастырушыларымен бірлесе отырып, жеңімпаздарға қаржылай жүлде тағайындап, теміржолшылар мәртебесінің көтерілуіне атсалысты.