Қарт теміржолшы – 101 жаста

Ақтөбе облысындағы Ұлы Отан соғысының жалғыз ардагері, қарт теміржолшы Грецкий Василий Иванович 101 жасқа толды. Хромтау ауданының әкімі Нұрхан Тілеумұратов ардагерді жаңа жылмен және туған күнімен құттықтап, жылы лебізін білдірді.

Василий Грецкий – Ақтөбе облысындағы көзі тірі жалғыз соғыс ардагері. 101 жастағы қарат майдангер Хромтау ауданында тұрады. Қария таңғы жаттығуын жасап, салауатты өмір салтын сақтауды әдетке айналдырған.  

«Елде тек тыныштық болсын. Ұрпақ ашық аспан астында өмір сүрсін. Биыл Жеңістің 80 жылдығы. Әлемде соғыс болмасын. Соғыстан кейін ұзақ жыл теміржол саласында жұмыс істедім. Әріптестерім әлі күнге дейін келіп тұрады, бәріне ризамын», – деді ардагер теміржолшы.  

Василий Иванович 1924 жылы Беларусь елінде дүниеге келген. Еңбекке ерте араласқан ол 1942 жылы майданға аттанып, Украина, Беларусь майдандарында соғысып, Польша, Чехословакияны азат етуге қатысып, Германияға дейін жеткен. Жеңісті Берлиннен 75 шақырым жерде орналасқан госпитальде қарсы алған ардагер бүгінде 3 баласынан 6 немере, 10 шөбере сүйіп отыр.  

Аудан әкімі Василий Ивановичтің өмір жолы өскелең ұрпаққа үлгі екенін жеткізіп, Жеңістің 80 жылдық мерейтойын қарсы алғалы отырған ардагерге мықты денсаулық тіледі.