Қысқы каникул қызығы
Қызылорда облысы бойынша меншікті тілші
Балалардың қысқы демалысты көңілді де пайдалы өткізуіне байланысты түрлі іс-шаралар әзірлейтін компания басшылығы биыл да олардың каникул кезінде еліміздің көрікті жерлерін тамашалап, тарихи, танымдық орындарға саяхат ұйымдастырды.
Қызылорда ЖТ бөлімшесінде еңбек ететін 12 теміржолшының баласы Алматы мен Ақмола облыстарындағы демалыс орындарына саяхаттап келді. Олар 10 мен 13 жас аралығындағы, көпбалалы отбасылар санатына сәйкес іріктеліп алыныпты. Бөлімшенің кадр бөлімінің бастығы Орынкүл Нұрмашқызы аймақ балаларының қысқы каникулдағы демалыс-саяхаты жоғары деңгейде ұйымдастырылғанын айтты.
– Биыл «ҚТЖ-ЖТ» серіктестігі басшылығының ұйытқы болуымен балалар Зерендідегі «Парус» және Алматы облысындағы «Спутник» демалыс орталықтарында қыс қызығын өткізді. Олар шаңғы теуіп, сноуборд, конькимен сырғанап, таза ауада қыдырып, облыстардың көрікті жерлерін аралады. Сонымнен қатар балалардың уақытты қызықты өткізуі үшін түрлі спорт жарыстары, мәдени-көпшілік бағдарламалар негізінде пайдалы іс шаралар ұйымдастырылып, естен кетпес естеліктер сыйлады. Ата-аналар аймақ теміржолшыларының балаларын назардан тыс қалдырмай, бос уақыттарын тиімді өткізуіне көңіл бөлген компания басшылығына алғыс білдіріп, ұйымдастырушыларға рахмет айтуда, – дейді кадр бөлімінің бастығы.