Колледж теміржол мекемелерімен келісімшартқа отырды
Ақтөбе облысы бойынша меншікті тілші
«Жұмысшы мамандықтар жылы» аясында Шалқар көпсалалы колледжі дуалды оқыту жүйесі аясында теміржол мекемелерімен келісімшартқа отырды.
Енді аймақтағы Шалқар электрмен жабдықтау дистанциясы, «Қамқор локомотив» ЖШС, Ақтөбе локомотив пайдалану депосы, Шалқар сервистік орталығы, «Қамқор Вагон» ЖШС және Шалқар вагон жөндеу депосының қызметкерлері білім ордасындағы өндірістік сабақтарға қатысып, болашақ теміржолшылардың білім-білігін арттыруға атсалысатын болады.
Бұл бастама жұмысшы мамандықтарының маңыздылығын арттыруға, жастарды осы салаға тартуға және еңбек нарығында сұранысқа ие мамандықтар бойынша білікті кадрларды даярлауға бағытталып отыр. Колледж базасында теміржол мамандықтары бойынша Республикалық оқу-әдістемелік бірлестігі бар. Бірлестікте теміржол мамандықтарына арналған Мемлекеттік білім беру стандарттары, ережелер, әдістемелік нұсқаулықтар әзірленген.
– Шалқар көпсалалы колледжі дуалды білім беру жүйесі аясында теміржол мекемелерімен серіктес болды. Шалқар ауданындағы техникалық және кәсіптік білім беру саласында теміржолшылар өндірістік педагог ретінде шақырылды. Білім ордасындағы студенттер теміржол мекемелеріндегі жұмыс процесімен танысып, ішкі жұмыстарға қатыса алады, – дейді Шалқар электрмен жабдықтау дистанциясының өндірістік оқыту шебері Ерғазы Серғазин.
Шалқар көпсалалы колледжінде бүгінде 250-ден астам студент білім алуда. Олардың негізгі құрамын Шалқар қаласының жергілікті тұрғындары мен ауылдық елді мекендерден келген студенттер құрайды. Оның ішінде Ақтөбе облысы, Ойыл ауданынан келген бірнеше жас тепловоз машинисінің көмекшісі мамандығын игеруде.