Мереке иелеріне құрмет көрсетілді
"Қазақстан теміржолшысы" газетінің Жамбыл облысындағы меншікті тілшісі
Қиындығы мен жауапкершілігі мол салада ер азаматтармен бірдей қызмет атқарып, адал еңбек етіп жүрген қыз-келіншектер көп. Әулетімен бірге саналы ғұмырын теміржолға арнаған аналар да бар.
Солардың ішінде жемісті жұмысымен көзге түскен мамандарды «ҚТЖ-Жүк тасымалы» ЖШС «ЖТ Жамбыл бөлімшесі» филиалының директоры Айдын Сеитбенбетов 8 наурыз – Халықаралық әйелдер күні мерекесіне орай арнайы құттықтап, сый-құрмет көрсетті.
Бұл күні Жамбыл филиалы және салалық кәсіподақ ұйымы ерекше мерекелік құттықтау ұйымдастырды. Таңертең Жамбыл бөлімшесіндегі әйел азаматтарды гүл шоқтарымен қарсы алып, мерекелік көңіл күй сыйлады.
– «ЖТ Жамбыл бөлімшесі» филиалында түрлі қызметтерді үлкен жауапкершілікпен атқарып жүрген аналар, қыз-келіншектер теміржол саласының дамуына зор үлес қосып келеді. Мерекеге орай оларға сый көрсетсек, бұл адал еңбекке деген құрмет. Жалпы, бұл мамандықты көп жағдайда теміржолшылар әулетінің ұрпағы таңдайтынын ескерсек, өз жұмысына адал еңбек иелерінің әсіресе, болашақ мамандарды даярлау ісіндегі рөлі ерекше. Ананың тәрбиесін, әкенің өнегесін көріп өскен жас жеткіншектерден келешекте мықты теміржолшы шығады, - дейді Айдын Сеитбенбетов.
