Машинистер ауылындағы той

Қызылорда локомотив пайдалану депосында биылғы Наурыз мерекесі ауқымды түрде аталып өтті. Депо ауласында алты қанат үй тігіліп, қонақтар шақырылып, көпшілік бір-бірін Ұлыстың ұлы күнімен құттықтап, ардагерлер бата берді.

Ашық алаңқайға алтыбақан тігіліп, жастар бақанның екі басында кезек тербеліп ән шырқады. Ұлттық ас – наурыз көже дайындалып, ауыз бекіткен көпшілікке ауызашар берілді.  

Мерекеге орай ұйымдастырылған ұлттық ойындар қатысушылардың күшін, ептілігін, табандылығын сынады. Арқан тарту тек ерлер ғана емес, қыз-келіншектер арасында да өтті. Нәтижесінде қыздар ерлермен тең дәрежеде өнер көрсетіп, 3-орынды иеленді, 2-орын 4-колоннаға берілді. Ал бірінші орынды 5-колонна машинистері қанжығалады.  

Келесі сайыс қол күресі болды. Бұл бәсекеде Қайрат Қалмаханов 1-орын, Әміржан Қайратұлы 2-орын, Исабек Ғазиз 3-орынды иеленіп, өздерінің күш-жігері мен ерік-жігерін танытты. Ал кір тасын көтеруден Қайрат Ташимов 1-орын, Бақыт Мамбеталиев 2-орынды иеленіп, Дәурен Смағұлов 3-орынды қанағат тұтты. Бұл сайыста қатысушылардың кір тасын кемі 65-70 рет басынан асыра көтеруі көрермендерге ерекше әсер сыйлады.  

Наурыз мерекесінде сыр күрішінің бір қабын иыққа салып (ең жоғарғы нәтиже 60 рет) отырып-тұру сайысы да ұйымдастырылып, оған ардагерлер де қатысып, тамаша нәтиже көрсетті. Ләңгі тебу жарысында да машинистер қауымы арасындағы бәсеке қызу өтіп, Ерлан Әбдікәрімов бірінші орынды, Бақыт Мамбеталиев екінші орынды иеленіп, Қаныш Өтегенов үшінші орынға жайғасты. Ұлттық ойындарға белсене қатысып, жарыс шыңын бағындырған машинистерге депо басшылығы мен кәсіподақ ұйымы атынан арнайы диплом мен сыйлықтар табыс етілді.